_To Syr John Paston, Knyght, or to Thomas Stomppys, to delyver to the
seyd Syr John._
[Sidenote: 1470 / JUNE 25]
As I sent yow woord by a lettyr that John Wymondham browght to London,
J. Pampyng is endyghtyd of felony, and Edmund Broon as princypallys, and
ye as axcessary, for schotyng of agonne in Awgust last past, whyche
gonne kyllyd ij. men; and I trowe that my Lord of Norff. consayll wyll
make on of the wedows, or bothe, to swe an apell up on the same
endyghtment thys terme. Wherfor I pray yow se well to thys mater, that
when it is sertyfyid in to the Kyngys Benche, Broom and Pampyng may have
warnyng that they may purvey for hem self, if ther com eny _capyas_
owght for hem. Townysend can tell yow all the mater.
Also ye must in eny wyse be ware, for my grauntdam[75-1] and myn Lady
Anne[75-2] and myn Oncyll Wyllam shall be at London within thes viij. or
x. dayis, and I wot well it is for nowght ellys but to make myn Oncyll
Wyllam swyr of hyr lond, notwithstandyng she hath reryd affyn of it be
for Goodreed,[75-3] the Justyse, in my grauntfadyrs dayis, and my modyr
tellyth me that ye have the copye of the same fyne; I wold avyse yow to
have it redy, what so evyr betyd. I trow they wyll be the more besy
abowght the same mater, because they thynk that ye dar not com in
London, nor at Westmenstyr to lett [_stop_] them; but if so be that ye
have not the copy of the same fynne, look that ye spare for no cost to
do serche for itt, for it wyll stand yow on hand, I feell by the
werkyng.
Thys day sevennyght I trust to God to be forward to Caunterbery at the
ferthest, and upon Saterday com sevennygh I tryst to God to be in
London; wherfor I pray yow leve woord at yowr plase in Fleet Strett wher
I shall fynd yow, for I purpose not to be seyn in London tyll I have
spook with yow.
I pray yow remembyr thes maters, for all is doon to make yow to drawe to
an ende with thes Lordys that have your lond fro yow. No more, but I
pray God send yow your herttys desyir in thees maters and in all othyr.
Wretyn at Norwyche, the Monday next aftyr Seynt John Baptyst.