. . . . . . .
Item, as for Mestresse Kateryn Dudle, I have many tymes recomandyd yow
to hyr, and she is noo thynge displeasyd with itt. She rekkythe not howe
many gentylmen love hyr; she is full of love. I have betyn the mater for
yow, your onknowleche, as I told hyr. She answerythe me, that sche woll
noon thys ij. yer, and I beleve hyr; for I thynke sche hathe the lyffe
that sche can holde hyr content with; I trowe she woll be a sore
laboryng woman this ij. yer for mede of hyr sowle.
And Mestresse Gryseacresse is sure to Selenger, with my Lady of Exestre,
a fowle losse.
Item, I praye yow speke with Harcort off the Abbeye, for a lytell
clokke, whyche I sent hym by James Gressham to amend, and that ye woll
get it off hym, and it be redy, and sende it me; and as for mony for hys
labor, he hathe another cloke off myne, whyche Sir Thomas Lyndes, God
have hys sowle! gave me; he may kepe that tyll I paye hym. Thys klok is
my Lordys Archebysshopis, but late not hym wete off it, and that itt
[be] easely caryed hyddre by yowr advyse.
Also as for orenges, I schall sende yow a serteyn by the next caryer.
And as for tydynge the berer hereoff schall infforme yow; ye most geve
credence to hym.
As for my goode spede, I hope well. I am offryd yit to have Mestresse
Anne Haulte, and I schall have help i nowe, as some say.[69-1]
. . . . . . . .
Item, it is soo that I am halffe in purpose to com home with in a
monythe her afftr, or abowt Med Lente, or beffor Esterne, ondyr yowr
coreccon, iff so be that ye deme that [my] modre wolde helpe me to my
costys, x. mark or ther abowt; I praye feele hyr dysposicion and sende
me worde.
Item, I cannot tell yow what woll falle off the worlde, for the Kyng
verrely is dysposyd to goo in to Lyncoln schyr, and men wot not what
wyll falle ther off, ner ther afftre; they wene my Lorde off Norffolke
shall[69-2] brynke x.^ml. men.
Item, ther is comen a newe litell Torke, whyche is a wele vysagyd
felawe, off the age off xl. yere; and he is lower than Manuell by a
hanffull, and lower then my lytell Tom by the schorderys, and mor lytell
above hys pappe; and he hathe, as he seyde to the Kynge hymselffe, iij.
or iiij. sonys, chyldre, iche one off hem as hyghe and asse lykly as the
Kynge hymselffe; and he is leggyd ryght i now, and it is reportyd that
hys pyntell is as long as hys legge.
Item, I praye yow schewe, or rede to my moodre suche thynges as ye
thynke is for her to know, afftre yowr dyscression; and to late hyr
undrestond off the article off the trete between Syr Wylliam Yelverton
and me.
Item, my Lorde of Warwyk, as it is supposyd, schall goo with the Kynge
in to Lyncolne schyre; some men seye that hys goyng shall doo goode, and
som seye that it dothe harme.
I praye yow evyr have an eyghe to Caster, to knowe the rewle ther, and
sende me worde, and whyther my wyse Lorde and my Lady be yit as sottyt
[_? besotted_] uppon it as they were; and whether my seyd Lorde
resortythe thyddre as offte as he dyd or nott; and off the dysposycion
off the Contre.