[Sidenote: 1470 / MARCH 1]
Ryght worchepfull Syr, I recomand me to yow aftyr the old maner,
sertyfyng yow that I have comonyd with my modyr for your coming hom, but
I can not fynd by hyr that she wyll depert with eny sylvyr for your
costis, for she and hyr cwrate[66-2] alegge mor poverte then ever wasse.
Item, as for your clok at Harcortis it wyll be nye Estern er it be redy,
for ther is stolyn owt of hys chaumbyr some of the ger that belongyd
therto, and that must have leyser to be mad ayen. Item, the caryer
forgat your byll behynd hym, but it was delyveryd all to gedyr, but it
shall be browght yow and the wyndas with the teles by the next caryer,
as myn orangys shall com to me I tryst. Dame Elyzabet Calthorp is a
fayir lady and longyth for orangis, thow she be not with chyld. Item,
I pray yow that ye wyll make aqwetance on to the person of Mawtby[66-3]
and to John Seyne as executors to John Dawbeney, for they wyll take non
admynystracyon of hys goodis tyll they be aqwetansyd of youre and my
modyr. Ye maye do it well j nough, so God help me; for I wot well ye owt
hym mony, and he nat yow, if so be that he wer trewe when he dyid, and I
wot well we fond hym nevyr on trew in hys lyve; but hys frendys and
othyr of the contre putt grett defawt in me that ther is no thyng don
for hym, seying that he myght do no more for us but lose hys lyfe in
your servyse and myn; and now he is half forgotyn among us. Wherfor I
pray yow let thys be sped.
Item, as for Doctor Pykenham, J. Pampyng can tell yow he is not in
Norwyche. When he comyth I shall spek with hym and send yow hys answer.
Item, as for myn oncyll Wylliam, I have grant to have a byll of hym what
every thyng lythe for; but all thyng is not yet in rest ayen that was
remevyd for the chyrchyng of my Lady Anne. As sonne as I have the byll I
shall send it yow and hys answer, whyche he wyll fyrst have plegyd
owght, and also whethyr he purposyth to do as he seyd by my graundamys
lond.
Item, Gefrey Spyrlyng hathe ofte spokyn to me to send to yow for to
undyrstand how ye will deell with hym for hys place in Norwyche, for he
seythe that he had lever have your good mastyrship ther in then eny
othyr manys good lordshep; for and ye wyll be hys good mastyr he wyll
swe no ferther, or ellys he must.
Item, a for (_sic_) for myn old reknyng, I shall make it up in hast and
send it yow for your bettyr remembrance, for as me thynkyth by your
wrytyng ye have nye forgetyn it; but I am rype j now in it for myn owne
dyscharge. Item, I pray yow, take in to your a ward a short murry
jornade[67-1] of myn whyche Jacobyn, Wykis woman, hathe lest that she be
flyttyng and that it be exchetyd. Item, I pray yow send me swyr tydyngis
of the world in hast.
As for the bysheop of Wynchestyr, W. Wyrceteyr told my modyr that he had
takyn charge x. dayis or then Pampyng cam hom; but he wenyth that the
bysshop wyll be a yenst yow, in so myche that [he[67-2]] avysyd my modyr
to consell yow that ye sholl labor to my Lord Cardynall[67-3] that the
seyd byshop shold not be amytted to take admynystracyon. No mor, &c.
Wretyn at Norwyche the fyrst daye off Marche.