Caystr yelded.--J. P.
[Sidenote: 1469 / [SEPT.]]
Ryght werchepfull sir, I recomand me on to yow. And as for the serteynte
of the delyverance of Caster, John Chapman can tell yow how that we wer
enforsyd therto, as wel as mysylf. As for John Chapman and his iij.
felaws, I have purveyd that they be payid ache of them xl_s._, with the
mony that they had of yow and Dawbeney; and that is inow for the seson
that they have don yow servys. I pray yow geve them ther thank, for by
my trowthe they have as well deservyd it as eny men that ever bare lyve;
but as for mony, ye ned not to geve hem with owt ye wyll, for they be
plesyd with ther wagys. Wryttyll promysyd me to send yow the serteynte
of the apoyntement. We wer sor[57-1] lak of vetayl, gonepowdyr, menys
herts, lak of suerte of rescwe, drevyn therto to take apoyntement.
If ye wyll that I come to yow, send me woord, and I shall pervey me for
to tery with yow a ij. or iij. dayis. By my trowthe, the rewardyng of
syche folkys as hathe ben with me dwryng the sege hathe putt me in gret
danger for the monye. God preserve yow, and I pray yow be of good cher
tyll I spek with yow, and I trust to God to ese your hert in some
thynggys.