_The Duc of Norff’._
[Sidenote: 1469 / SEPT. 26]
John, Duke of Norffolk, Erle Marshall of Sussex, Surrey, and of
Nottingham, Marshall of Inglonde, Lorde Mowbray of Segreve, Bromfelde,
and Yalle, to al our frendes, servauntes, and othir Crystyne people,
gretyng. Wher John Paston, esquier, and othre diverse persones forseble
hath kepte the manoir of Castre, contrary to our will and pleaser, and
aftirwarde by his lowly labour and gret meanese to us maade, the seide
John Paston hathe maade deliveraunce of the seide manoir to such persons
as we have assignede, and he and his seide felouship by our lycence to
departe out of the same. Wherefore we pray, wil, and charge you and
everysche of you, that ye ne vexce, trouble, manase, ne greve the
forseid persones, nor eny of them, for the kepyng of the seide manere
contrary to the Kynge our Sovereynge Lordes lawyes, for we have takyne
them in our safe garde. Yevin undir our signet and signmanuell the
xxvj^ti day of Septembre, the ix^th yere of Kynge Edward iiij^t.