_To Mastyr Wryttyll._
[Sidenote: 1469 / [SEPT.]]
Master Wrytyll, I recomande me to yow, besechyng yow hertely, as myn
holl trust is in yow, that ye doo yowr devoyr to contynew trews tyll
Fryday or Saturday in the mornyng, by whych tyme I hope the massanger
shall come, and that ye be not dryven to take an appoyntment if ye kan
undrestand by any lyklyed that itt be able to be abydyn and recystyd,
and that ye fele my brotherys dysposycion therin, as my trust is in yow,
prayng yow to remembre that it restythe, as God helpe me, on all my
well. For as God helpe me, I hadd levyr the place wer brennyd, my
brother and servants savyd, than the best appoyntment that evyr ye and I
comonyd of scholde be my goode wyll be takyn, if this massage from the
Kynge may reskwe it. And if it be so, that my Lorde be remevyd by the
Kynges comandement, whyche restythe with hys honour, I may in tyme to
kome do hym servyse, as schall recompence any grodge or dysplesur that
he evyr had, or hathe to me or myn; and ye, if it the rather by your
wysdam and polesye the moene above wryten may be hadd, schall be as sewr
of the servyce of my trewe brother and servantys, and me, as ye kan
devyse by my trowthe; for in goode feythe thys mater stykyth mor nyghe
myn hart and me than I kan wryght on to yow, and to my brother and
servaunts mor ner than as God knowyth they wot off. Wherfor, Master
Wryttyll, all owre welfare restyth in yow, besechyng yow to remembre it.
For thys mater is to all usse eyther makyng or marryng.
Item, asfor Arblaster or Lovell, I kan not thynke that they or any of
them may be with yow. Wherfor in yow is all, and God have yow in kepyng.
Wretyn at London, the day next affor yowr departyng. I schall sende yow
mor knowleche to morrow, with Godds grace.
Yowrs,