[Sidenote: 1469 / [MAY]]
Syr, plesyth it to undyrstand, that I conceyve, by your lettyr whyche
that ye sent me by Jwde, that ye have herd of R. C.[21-2] labor whyche
he makyth by our ungracyous sustyrs[21-3] assent; but wher as they wryet
that they have my good wyll ther in, savyng your reverence, they falsly
lye of it, for they never spake to me of that mater, ner non othyr body
in ther name. Lovell axyd me onys a qwestyon whedyr that I undyrstood
how it was betwyx R. C. and my suster. I can thynk that it was by Callys
menys, for when I axyd hym whedyr C. desyird hym to meve me that
qwestyon or not, he wold have gotyn it aweye by humys and by hays, but I
wold not so be answeryd; wherfor at the lest he told me that hys oldest
sone desyird hym to spere [_inquire_] whedyr that R. C. wes swyr of hyr
or nowt, for he seyd that he knew a good maryage for hyr, but I wot he
lyeyd, for he is hole with R. Cale in that mater. Wherfor to the entent
that he nor they sholl pyck no comfort of me, I answerd hym, that and my
fadyr, whom God asoyle, wer a lyve, and had consentyd ther to, and my
modyr, and ye bothe, he shold never have my good wyll for to make my
sustyr to selle kandyll and mustard in Framlyngham; and thus, wythe mor
whyche wer to longe to wryet to you, we departyd.
And wher as it plesythe you in your lettyr to crye me mercy for that ye
sent me not syche ger as I sent yow mony for, I crye yow mercy that I
was so lewde [_bold_] to encomber yow with eny so sympyll a mater,
consyderyng the grette maters and weyghty that ye have to doo; but need
compellyd me, for in thys contre is no syche stuffe as I sent to yow
for.
Also, wher as it plesyth yow to send to Rychard Calle to delyver me
monye, so God help me, I wyll non axe hym for my sylfe, nor non had I of
hym, nor of non othyr man but of myne owne, syne ye depertyd; but that
lytyll that I myght forbere of myne owne, I have delyveryd to Dawbeney
for howsold, and pay it for yow in menys wagys; and ther for who ever
sendys yow word that I have spent yow eny mony syne ye went hens, they
must geve yow an othyr reknyng, savyng in met and drynk, for I eete lyek
an horse, of purpose to eete yow owte at the dorys. But that nedythe
not, for ye com not within them; wherfor, so God help me, the felaushep
her thynkys that ye have forgetyn us alle. Wherfor and eny thyng be ille
rewlyd when ye come home, wyet it [_impute it to_] your selfe for defawt
of oversyght.
Also, I undyrstand for verry se[r]teyn, and it is sent me so woord owt
of my Lordys howse, that thys Pentcost is my Lordys consell at
Framlyngham, and they purpose thys week and the next to hold coortys her
at Caster, and at all othyr maners that wer Sir John F.,[22-1] and
purchasyd of Yelverton and of Syr T. H.,[22-2] whom God asoyle, and how
that my demenyng sholbe, it is to late to send to yow for avyse;
wherfor, and I do well I axe no thank, and if I do ille, I pray yow
leythe the defawt on over lytyll wyte, but I purpose to use the fyrst
poynt of hawkyng, to hold fast and I maye; but so God help me, and they
myght pulle downe the howse on our hedys, I wyet [_blame_] hem not,
whyche I trust to God to help hem from; for by God that bowght me, the
best Erle in Inglond wold not dele so with my Lord and my Lady as ye do,
withowt makyng of some menys to them; so God help me, whoso ever avyse
yow to do so, he is not your frend. And I may, I trust to God to se yow
abowght Mydsomer or befor, for in good feythe I wene ye purpose yow that
it shall be Estern er ye come hom, for all your servants her wen [_here
ween_] that ye purpose ne more to dele with them, but to leve hem her
[_here_] in ostage to my Lord of Norfolk.
Also, syr, I pray yow purvey what Ine that my brodyr Edmund shall be in,
for he losythe sore hys tyme her, I promyse yow; I pray yow send me word
by the next messenger that comyth, and I shall eythyr send hym or bryng
hym up with me to London.
Also, syr, we pore _sanz deners_ of Castr have brook iij. or iiij.
stelle bowys; wherfor we beseche yow, and ther be eny maker of steele
bowys in London whyche is very kunnyng, that ye wyll send me woord, and
I shall send yow the bowys that be broken, whyche be your owne greet
bowe, and Roberd Jacksonys bowe, and Johon Pampyngs bowe; thes iij. have
kast so many calvys, that they shall never cast qwarellys[23-1] tyll
they be new mad.
I praye yow fynd the menys that my Lord have some resonable meane
profyrd, so that he and my Lady may undyrstand that ye desyr to have hys
good lordshep. I promyse yow it shall do yow ease and your tenaunts
bothe, and God preserve.