_To myght’ well belovyd brother, John Paston, or to John Dawbeney, in
his absence._
[Sidenote: 1469 / MARCH 17]
Ryght worschypful and well belovyd brother, I comand me to yow, letyng
you wete that Sir Thomas Howes hadde a free chapell at Castr, wher of
the gyfte longyth to me, whyche chapell, as I understande, scholde be in
the olde tyme, er the place at Caster wer bylte, with in the motte,
wherfor I ame but the better pleased; and soo it is now that at the
speciall request of the Qwen and other especiall good Lordes of myn,
I have gevyn it to the berer her of, callyd Master John Yotton, a
chapleyn of the Qwenys. Neverthelle[ss] in tyme passyd I proposyd that
the master of the colegg scholde have hadd it, and so er longe to I hope
he schall, wherfor I thynke he most take possession, and that is the
cawse of hys comyng. Wherfor I pray yow make hym good cher. He is
informyd that it scholde be worthe C_s._ be yer, whyche I belyve not;
I thynke it der jnow xl_s._ by yeer. He most have it as it was hadde
befor.
Item, thys daye I understonde that ther be comen letteris from my moder
and yow, and Dawbeney, wherin I schall sende yow answer when I have seyn
them.
No mor at this tyme, for within this iij. dayes I shall lette yow have
kneleche of other maters.
Wretyn the xviij. day of Marche.
Whether he nedyth indoccion, or institucion, or non, I wot not; if it
nede, brother, ye may seale any suche thynge as well as I. Master Stevyn
kan tell all suche thynges.