_To the ryght worshypfull and hys best betrustyd Frende, Roger
Townesende._
[Sidenote: 1467-9 / FEB. 12]
Right worshipfull sir, I comaunde me to yow, praying yow hertly to
remembre that by the award made bytwen yow and me by Roger Townesend for
a tenement in Stratton in Norfolk callid Rees, I shuld delyver yow all
the evydens apperteynyng to the said plase, and not from thens forth to
chalenge nor interupte my lady your wife ner yow of the said tenement;
And that for thes said causes ye shuld and therto were agreyd to geve me
an horse and x_li._ to an harneys. And moreovir before Cristemasse in
the kynges chambre ye ther ageyn promysed me that ye wold such tyme as I
send to yow home to yowre plase by any servant of myne er any man from
me, that ye wold delyver it hym and send it to me by hym. My brothir
John hath send me word that he remembird yow therof on my behalfe and
that you answerid hym that ye wold gyfe hym or me a fayre harneys at
your comyng to London. I deme in yow that ye thynke par case to bye a
fayre harneys here for x. markz; but, cosyn, as God help me, I bowte an
harneys syn that tyme for my self, which cost me xx_li._ But I con not
desire of yow so moch. Wherfore, cosyn, with all myn hert I pray yow
accordyng to yowre promyse that it like yow to send me by my servaunt,
berer herof, the said somme of x_li._, as my trust is in yow, and as I
wolde in like case have don to yow, and as in the premysses I delt
feithfully with yow and evir so shall dele, with the grase of God, Who
have yow in Hys kepyng. Wretyn at London the xii. day of
Feveryer.--Youris,