_To my moost worshupfull maister, Sir John Paston, Knyght._
[Sidenote: 1469(?)]
My moost woorshupfull and moost speciall maister, with all my servyce
moost lowly I recomande unto your gode maistirship, besechyng you most
tendirly to see me sumwhat rewardid for my labour in the Grete
Booke[1-2] which I wright unto your seide gode maistirship. I have often
tymes writyn to Pampyng accordyng to your desire, to enforme you hou I
have labourd in wrytyngs for you; and I see wele he speke not to your
maistership of hit. And God knowith I ly in seint warye [_sanctuary_] at
grete costs, and amongs right unresonable askers. I movid this mater to
Sir Thomas[1-3] late, and he tolde me he wolde move your maistirship
therein, which Sir Thomas desirid me to remembir wele what I have had in
money at soondry tymes of hym.[2-1]
. . . . . . .
And in especiall I beseche you to sende me for almes oon of your olde
gownes, which will countirvale much of the premysses I wote wele; and I
shall be yours while I lyve, and at your comandement; I have grete myst
of it, God knows, whom I beseche preserve you from all adversite. I am
sumwhat acqueyntid with it. Your verry man,