Chapitre .xxiiii.
Ce chapperon pour embelir ses gestes
Nous fault parer selon le temps qui court
D’affiquetz d’or/ de chaines/ de paillettes
Pour embellir & estre joliettes
C’est la maniere maintenant de la court
Aprés les grandes chascune va & court
Soit en habit ou de chef ou de corps
A qui mieulx mieulx & par communs accors
Tout est bien fait riens ne vueil contredire
Mais que vertu ne soit pas delaissee
Dont une fault sur ce point cy eslire
Si dignement qu’on ne puisse mesdire
En fournissant nostre oeuvre commencee
Ceste richesse sera bien advancee
Entre vertus par richesse de cueur
C’est ung tresor contre toute langueur
La richesse qui plus le cueur conforte
Le resjouyt & le tient en plaisance
C’est quant bon los acquiert & porte
Et qu’elle est franche de cueur & bonne sorte
Ceste richesse passe toute chevance
Et puis quant l’ame se sent en sa balance
Quicte de vices & de pechez maulditz
C’est la richesse pour le cueur que je dis
Riche est le cueur tout plaisant & joyeulx
Quant il se sent sans reproche & sans tache
Et par contraire tout povre & langoureux
Sentir en soy ung meffait dangereux
C’est ung regret qui grant douleur atache
L’ame & le cueur affin que chascun sache
Doivent estre gardez si nettement
Que tout joyeux en soit le pensement
C’est tout soulas que d’avoir le cueur munde
Ou il n’y ait que franche loyaulté
Et n’est plaisir si joyeux en ce monde
Car la dedans toute richesse habonde
Joye & honneur plain de felicité
Ung franc cueur net ne craint adversité
Riche de cueur vault trop plus que tout or
Au monde n’est si sumptueux tresor
Fuyons meffait ayons saine pensee
Gardons l’honneur s’on veult que le cueur rye
Faisons les oeuvres dont l’ame soit saulvee
Ce sont moyens d’avoir longue duree
Le droit meurdrier c’est la melencolie
Chascune dame qui ce livre estudie
Jugez se j’ayme ma dame loyaulment
En luy donnant loyal enseignement