Chapitre .xxiii.
Pour donc parfaire de ma dame l’atour
Convient avoir bon advis & regard
L’ouvrier qui fait le comble d’une tour
Quiert le moyen la praticque & le tour
Pour la parer car on n’y a regard
Ainsi me fault trouver moyen & art
Que je parface mon oeuvre seullement
Que ma maistresse en soit plus noblement
Je vis atours de diverses manieres
Porter aux dames pour les mieulx atourner
L’atour devant & celuy en derriere
Les haulx bonnetz coeuvrechifz a banieres
Les haultes cornes pour dames triumpher
Maintenant voy simples atours porter
Qui bien me plaist se sont les chapperons
Du temps present parquoy en parlerons
Ces chapperons d’honneste contenance
Des dames sont de velours ou satin
Et les bourgeoises les ont par differance
De beau drap noir ou rouge a leur plaisance
Chascun estat n’est pas pareil en fin
Dont ma maistresse que j’ayme de cueur fin
Tel chapperon aurez presentement
Ou toutes dames prendront amendement
Le chapperon tient le chef en santé
Et le garde de rume & de froidure
La cervelle tient en prosperité
L’entendement en bonne auctorité
Et la memoire subtille par droicture
Santé de chef demande couverture
Car se le chef souffre quelque douleur
Les autres membres n’en ont pas du meilleur
Or nous convient pour donner congnoissance
De la vertu que veult ce chapperon
Nous luy donrons nom de bonne esperance
Car il approche le chef & son essence
Plus que autre habit clerement le voit on
Dieu nous donna sur tous ce riche don
Que nous avons au ciel le chief dressé
La beste brutte a le sien abaissé
Puis que Dieu donc tant de bonté nous fait
Que nous tournons & les yeulx & la chere
Tirant au ciel ou est le lieu parfaict
De paradis qu’on acquiert par bien faict
Par foy/ par loy/ par vertu/ par lumiere
Nous devons bien celle grace avoir chere
Et esperance avoir au createur
Qui tant de biens nous depart & d’honneur
Esperance porte l’eschelle & dresse
Pour escheller le ciel & paradis
Esperance nous conduist & adresse
Pour parvenir a la haulte lyesse
D’estre sauvez es bras du crucifix
Sans esperance nous sommes desconfis
Par l’ennemy qui tousjours nous argue
Qui n’a espoir sa querelle est perdue
Ayons en Dieu l’espoir du divin estre
Esperons tous en la vierge sa mere
Qui nous menra pour nous seoir a la dextre
Du createur au grant jour qui doit estre
Du jugement ou fault que tout appere
Doulce sera la sentence ou amere
Car par justice le juge jugera
Lors viendra tart qui mercy requerra
Bonne esperance se prent en bonne vie
Et qui bien vit on le voit bien finir
Car qui bien fine Dieu est de sa partie
Qui Dieu acquiert il a gloire infinie
Et jouyt l’ame du paradis sans per
Soyons tous sages pour ce monde eschapper
Qui dure peu & si est transitoire
Si acquerons perpetuelle gloire