Chapitre .xx.
Encor fault il pour ma dame honoree
Des patenostres de jayet ou coral
Ou de fin ambre pour mieulx estre paree
Car par cela sera bien decoree
Elles sont propres pour metz especial
Les patenostres pour ung cueur liberal
Donnent memoire & souvenir de Dieu
Chacun le doit bien servir en tout lieu
Es patenostres convient beaux signeaulx d’or
Ou qu’elles soient toutes d’or en substance
Et esmailleez de rouge cler encor
Si n’y fault point espargner son tresor
Car es signeaulx fault quelque difference
Ces patenostres de devotte apparence
Seront par moy dictes devotion
Le nom est propre reste l’intention
Il fait bon veoir nobles dames devotes
Et cheminer de vertus en vertus
Je ne dy riens d’un grant tas de bigottes
Qui contrefont ainsi les dorelottes
Car leurs cueurs sont de vices revestuz
bonnes devottes tousjours de plus en plus
Pensant a Dieu & a sa passion
Servir Dieu est belle occupation
Or pensons donc de cueur devotement
Que le bon Dieu tout puissant & parfait
De riens quelconques le monde entierement
Par son seul dit l’a creé plainement
Et l’homme humain aprés du lymon fait
Comme les bruttes ne sommes pas effect
Mais il nous fist a sa forme & ymage
Devotement faisons a Dieu hommage
Ayez ma dame vraye meditation
Es patenostres de singularité
Car vous avez bonne information
De Jesucrist pour reformation
En contemplant sa saincte charité
Pensez qu’il a si grande auctorité
Que dessoubz luy sont sauvez ou dampnez
Tous ceulx qui furent & seront de Adam nez
Devotion vous soit vertu florie
Es patenostres comme prudente & sage
En servent Dieu & la vierge Marie
Non seul de bouche qui n’est que ypocrisie
Mais plainement de cueur & de courage
Devotion tout le temps de vostre aage
Vous donnera de Dieu telle memoire
Que es divins cieulx le verrés en sa gloire