Chapitre .xix.
Ces beaulx cheveux pignez honnestement
D’un blanc ruban nous conviendra brocher
Et les couchier sur le chief tellement
Que les cheveux n’aperent nullement
Plus vault la chose plus se doit tenir cher
Temps est de monstrer & temps est de cacher
Fuyr devez d’aultruy temptacion
Pour eviter dure dampnacion
Le ruban soit de fil moyen tissu
Pour mieulx tenir des cheveulx la lyeure
Ce riche bien doit estre peu perceu
Le bien secret est par desir conceu
Le metz commun n’est pas bonne pasture
Pecher de soy c’est oeuvre de nature
Mais procurer aultruy en malefice
Double sur soy le peché & le vice
A ce ruban qui tient en ferme lieu
Ses beaulx cheveulx dont ma dame s’atourne
Nous luy donrons en nom crainte de Dieu
Qui pense bien ce nom: est saige & preu
Car il resveille les vertus & adjourne
Eureux celuy qui des vices retourne
Et malheureux qui demeure en la fange
Servant le dyable & laisse le bon ange
Crainte de Dieu qui n’est pas sans amour
Aussi amour ne peut estre sans crainte
Parons nous en & de nuyt & de jour
C’est le dongon le chasteau & la tour
Pour preserver les cueurs de malle attainte
Le bon Dieu veult qu’on le crainde sans fainte
Quant a amour c’est l’amour des prescheurs
Pour rappeller a pardon les pecheurs
Fuyons tousjours faulx semblans & oeuillades
Ayons maintien ferme constant & saige
N’apetons point de faire gens malades
Par motz subtilz/ par rondeaulx/ par ballades
Qui de present sont en cours & visaige
Ne fardons point le front ne le visaige
Fuyons la cause qui aultruy bien empire
C’est ung peché qui ne peut estre pire
Crainte de Dieu est le commencement
D’amour divin & toute sapience
Crainte de Dieu expelle entierement
Vice & peché & rend planierement
L’homme constant pour vivre par prudence
Crainte de Dieu vous met par preference
Tout au plus hault & dessus vostre chef
Crainte de Dieu garde de tout meschef