Chapitre .xviii.
Ce noble corps est paré proprement
De triumphans & notables habitz
Dont fault le chief aorner tellement
Que tout soit bien & honnorablement
Car ma maistresse est dame de hault pris
Ces beaulx cheveulx qui est ung cas requis
Convient pigner/ car a tout fault pourvoir
C’est ung des soingz que femme doit avoir
Entendez bien pourquoy des cheveulx songne
Dames discrettes qui raison entendez
Je n’entens pas les mettre en besongne
Pour gens tempter en espoir de vergongne
De ce meschief saigement vous gardez
Mais il s’entent quant vous vous mariez
C’est l’enseigne dequoy se pare celle
Qui peut dire j’ay teste de pucelle
Ung pigne fault d’ivoire blanche & pure
Pour les cheveulx de ma dame adresser
Ung noble chief ne doit souffrir ordure
Tout net/ tout bon sans nulle couverture
Car ce labeur fait beaucop a priser
Dont pour ce pigne en bien auctoriser
Que de vertu face signifiance
Nous en ferons remors de conscience
Comme le pigne est fait de plusieurs dentz
Pour nectoyer les cheveulx de excellence
Par ce remort/ considere & entens
Sont ramentuz les pechez & le temps
Les maulx passez & la perseverance
Par ce remort se treuve repentance
Car ses dentz sont si trenchans & agues
Qu’ilz treuve tout a parolles perdues
De quatre dentz est ce pigne icy fait
Pour nettoyer peché vice & ordure
Le premier est regret de son meffait
Le second est propos pur & parfait
De plus renchoir en vilaine laidure
Le tiers prier a Dieu d’entente pure
Le quart porter fournir & satisfaire
La penitence ce point est necessaire
Gardons ce pigne de remors entassé
Nettoyons bien chef & entendement
Confessons nous du temps qui est passé
Car l’advenir doit estre compassé
De seur propos & vray amendement
Pourtant madame pignez vous frequemment
Affin qu’on die vela princesse bonne
Digne d’avoir & de porter couronne