Chapitre .xv.
Pour mieux parer se corps debout encor
En seur propos vertu & bonne guise
Robe nous fault qui sera de drap d’or
De couleur pourpre & qui vaille ung tresor
Tout le meilleur de Chippre ou de Venise
A la grant gorre comme une chose exquise
Et richement soit d’ermines fourree
Princesse vault d’en estre bien paree
L’oeil s’esjouit a veoir l’or resplandir
Chacun se mire chacun y prent plaisance
Les regardans ont soulas & plaisir
De veoir parure a leur chois & plesir
Et ne leur touche sinon le regard en ce
Or fault tirer vertueuse apparence
De cest habit que je baptise en bien
Pour la nommer robe de beau maintien
Toutes dames savourez ce couplet
De beau maintien soyez en aournees
Car comme l’or a l’oeil agree & plaist
Maintien de femme ou il plaist ou desplaist
Sur le maintien sont les notees fondees
Par fol maintien plusieurs ont renommees
Assez souvent qui approche diffame
Et sans peché de l’honneur & de l’ame
Vous jeunes filles qui desirés honneur
Laissez la lettre tout ouvrage & escolle
Se beau maintien qui tant est de valeur
Aprenez le & le faictes de cueur
Pour avoir loz qui leger court & volle
Car ce juge d’escript & de parolle
Qui n’est au monde tel tresor ne chevance
Meilleur pour femme que bonne contenance
Ainsi ma dame aura la riche robe
De beau maintien Dieu la luy entretienne
Et luy permette que nulz ne la desrobe
C’est ung tresor pour mettre en garde robe
De la vestir souvent bien luy souviengne
La fourrure bien la garde & maintienne
Qui est d’armines monstrant magnificence
Qui signiffie vertu d’obeissance
Le beau maintien l’obeissance prompte
C’est le moyen qui plus l’homme contente
Ce sont vertus qui le plus fier cueur dompte
Jamais n’aura ne vergongne ne honte
Qui ces deux poins maintient en bonne entente
Ma princesse ne soyez mal contente
L’amour de vous me fait cy traveiller
A toutes femmes loyaulment conseiller