Chapitre .vi.
Ung cousturier nous convient preparer
Pour ung corset donner a ma princesse
Et son beau corps revestir & parer
De noble abit pour la bien decorer
Car elle vault pour tout mettre en proesse
Ce beau corset je le vueil pour noblesse
D’ung blanc damas de blancheur nette & pure
C’est ung habit de royalle vesture
Le corset simple est bon & prouffitable
A vestir dames & les monstrer valoir
Car le corset est habit si notable
Qui est plaisant a tous & aggreable
Quoy qu’a danger on ne la puisse veoir
Et quant l’oeil peult sa dame percevoir
En ce corset sans plus estre aournee
Il en vault mieulx la pluspart de l’annee
Ce noble habit icy mis & bouté
Blanc en couleur affin que mieulx se voye
Nous lui donrons le nom de chasteté
C’est ung beau nom par vertu acheté
C’est des bienffaitz souveraine montjoye
Chasteté est le chemin & la voye
Pour mieulx garder vertus sans separer
Chasteté fait les dames honorer
Comme blancheur ne peult tache souffrir
Et ne peult estre par macule empiree
La chasteté ne pourroit soustenir
Tache de vice ne porter ne tenir
Franche veult estre pource fut elle nee
Ceste vertu ne vous soit oubliee
Soyez chaste en penser & en faitz
Si parviendrés au regne des parfaitz
Le corset simple fait les femmes priser
Monstre bon corps & plaist a chacun ame
Que pouroit donc plus princesse adviser
Pour avoir loz pour soy auctoriser
Que ce sçavoir sans reprouche de blasme
Qui peult sentir de ce grant bien la flame
Il se repose de corps d’ame & de cueur
Au lict de joye & parement d’honneur
Soyons tous chastes & dechassons luxure
Fuyons peché affin qu’on ne perisse
Fuions reprouche qui est lourde blesseure
Prenons habit de la riche parure
De chasteté qui nous est si propice
Appellons Dieu & sa mere nourrice
Les invocqueurs qui vertus requerront
Ja n’y faillirent ne jamais n’y fauldront
Querons d’aller partout teste levee
Quitte de doubte de reprouche & de honte
Crainte de Dieu ne soit pas destournee
Sans luy ne peult cest oeuvre estre menee
Car c’est le maistre qui les vertus surmonte
C’est le seigneur qui tout corrige & dompte
Qui peult le feu amendrir & estaindre
Dont le tison fait a doubter & craindre
Par chasteté tout honneur se maintient
Et par luxure vient honte & villannye
Princesse chaste sobrement se contient
Dont sa pensee ainsi qu’il appartient
Est des vertus toute heure premunie
Elle dechasse mauvaise compaignie
Folle plaisance n’y peut avoir sa place
Les purs & netz verront dieu face a face