Chapitre .v.
D’une lingiere nous convient la maistrise
Qui nous saiche faire couldre & tailler
Pour ma maistresse une bonne chemise
De riche estoffe car je luy ay promise
Riens que tout bien je ne luy quiers bailler
Le noble corps pour beau la pareiller
Se doit parer de chemise propice
Contre venin de peché & de vice
De fine toile la chemise doit estre
Que doit vestir si noble personnage
Toille de lin se doit la entremettre
Les coustures a dextre & a senestre
Doivent estre de si subtil ouvrage
Qu’elles ne blessent car ce seroit dommage
La chemise vault beaucoup en recors
Car elle touche le plus noble du corps
Continuant nostre habit en bonté
Ceste chemise que sera ce en vertu
Je luy donne le nom d’honnesteté
Que dames doivent tenir en grant cherté
Qui n’est honneste honte va au dessus
Honnesteté vault des biens beaucop plus
Que une princesse ne peut pas exprimer
Ce qui est bon se doit bien estimer
Se la chemise est de fin lin tissue
Et nette & blanche & doulce les coustures
Honnesteté est de raison cousue
Honte & vergongne chascune s’esvertue
Pour la monstrer sur toutes les vestures
Honnesteté fait aux vices injures
Honnesteté toutes vertus approche
Appete honneur & fait tousjours reprouche
Honnesteté se congnoist en maintien
En beau parler respondre & enquerir
Honnesteté se voit/ qui l’entend bien
En tous estatz par querir le moyen
Sans ravaller ne trop hault acquerir
Honnesteté se doit bien abstenir
De nulz tromper/ & plus d’estre trompee
Car la follie seroit trop achetee
Honnesteté soit devant nostre face
Soyons honneste & honte deboutons
Quant hardiesse de dame vient en place
Le jugement est de petite grace
Et par cuider nostre loz combatons
Honneste en fais quiers que nous apparons
Ma maistresse ceste vertu guerdonne
Et fait avoir le renom d’estre bonne