Chapitre .iii.
Ayons aprés ung chaussetier d’honneur
Qui nous fera chausses pour ma maistresse
Continuant cest habit de valeur
Du plus fin drap du plus riche & meilleur
Dont l’on pourra recouvrer par adresse
Pour la santé/ la chausse vault richesse
Et quoy que chausses se monstrent a danger
L’habit est bon & ne se doit changer
La chausse tient la jambe nettement
Garde le froit: & coeuvre la chair tendre
Chausses se tirent pour estre gentement
Chausses font bien sans nul encombrement
L’on ne les peut trop acheter ne vendre
La chausse est cointe/ mais a le bien entendre
On la voit peu: & se doit retarder
Car elle aproche ce qu’on doit plus garder
Accomparons la vertu & puissance
De ceste chausse de fin drap estoffee
Continuant l’euvre que je commence
Nous en ferons bonne perseverance
Sur les vertus elle est recommandee
Perseverance est serrure fermee
Ou se garde le tresor de bien faire
Perseverance est vertu necessaire
Comme la chausse de bon drap composee
Plus obeyt/ dont la jambe vault mieulx
Perseverance est de bonté prisee
Et obeyt pour tenir l’assemblee
Des grans vertus par tout & en maintz lieux
Perseverance est ung bien fructueux
En la laissant vertus sont separees
L’honneur se pert dames sont desparees
Perseverons a suyvre bonnes meurs
Fuyons oyseuse qui les vertus reboute
Perseverance en bien nourit les cueurs
Enrichit l’ame/ augmente les honneurs
C’est des vertus la droicte passe routte
Fuyons fuyons oubliance qui couste
Et fait perir bon renom loz & pris
Perseverons se voulons avoir pris
Jusque a la fin on doit perseverer
Commencement n’est encor oeuvre faicte
Et si doit on en bonne fin preferer
Perseverant qui veult bien operer
Pour tousjours tendre a bonne fin parfaicte
Perseverance n’a jamais de deffaicte
C’est ung tresor tout noble & precieux
Perseverance conduit l’ame es saintz cieulx