Chapitre .ii.
Ung cordonnier nous convient adresser
Qui nous fera des souliers par maistrise
Pour le gent pied de ma dame chausser
Fait de tel art qui ne la puist blesser
Telle façon est aux ouvriers requise
Gente chaussure chascun la loue & prise
Ainsi feront des souliers si apoint
Qui nous viendront se Dieu plaist bien apoint.
Souliers gardent de mal & de blessure
Les piez souvent dont le corps vault mieulx
Et s’il convient cheminer bonne allure
Sur le souler se fait cest advanture
Dont la pantouffle s’abandonne en maintz lieux
Les soulers sont si bons & vertueulx
Qu’ilz prouffitent pour saulver ung royaulme
Le loz l’honneur & prouffit d’une dame
Dont ces souliers/ pour en faire apparence
En la parure que voulons acoustrer
L’ung sera soing/ & l’autre diligence
En delaissant paresse & negligence
Dont moult de maulx se pevent rencontrer
Diligence passe sens/ il est cler
Diligence vainct dangier & fortune
Et maintesfois envieuse rancune
Diligence menee par raison
Vault tant de biens que l’on n’en scet le compte
Et s’elle meult de cas de desraison
De vengence d’amours ou mesprison
Il ne vault pas qu’on en parle ou racompte
Mais quant vertu diligence surmonte
Dieu en est guyde/ menant a bonne fin
Le cheminant son desir & chemin