Chapitre .i.
Roynes d’honneur marquises & princesses
Entendez cy dames & damoiselles
Femmes serventes bourgoises & maistresses
Venez partir a mes grandes richesses
Goustés les bien vous les trouverez belles
Mes pompes sont es maulx nouriz nouvelles
C’est ung habit a toutes bien apoint
Pour triumpher & estre bien en point
Sachez premier que la vierge Marie
Fleur des eslites & dame de bonté
Royne des cieulx affin que ne varie
Qui fut la verge du bon Yessé florie
Ainsi eslite pour son humilité
De saincte eglise est souvent recité
En son devot & gratieulx canticque
Comme il est sceu par louenge autentique
Pour commencer des panthouffles nous fault
Pour mieulx fournir ceste noble parure
Riens oublier ne vueil car l’habit vault
Qu’il soit fourny du pied jusques au plushault
Continuant ceste noble vesture
La panthouffle est une saine chaussure
Au pied fait bien & prouffit cordial
Ce qu’elle vault est bien espicial
La pantouffle c’est le seul soubstenement
Du corps entier & de sa pesanteur
Mainte personne a garde sainement
Pour la santé c’est ung solagement
Pour tenir sec ou par doulce moisteur
La pantouffle conduit le chemineur
Et obeyt selon qu’on la convoye
Par bon chemin ou par mal nette voye
De la pantouffle ne nous vient que senté
Et tout prouffit sans griefve maladie
Pour luy donner tiltre d’auctorité
Je luy donne le nom d’humilité
C’est des vertus que une fleur anoblye
Pour Dieu madame que ce point l’on n’oublye
Telle vertu nous fera renommer
Depuis les mons jusques a la rouge mer
Celle panthouffle tout soustient & supporte
Et obeit par chemin seurement
Humilité le fais soustient & porte
De ce qu’on voit qu’on sent & qu’on raporte
Et passe tout sans courroux doulcement
Humilité plaist a Dieu seullement
Ung humble cueur ne scet riens requerir
Ne demander qu’il ne puisse acquerir
Humilité porte telle vigueur
Pour avoir paix & divine concorde
Que par sa doulceur & benigne liqueur
Remet le glaive de divine rigueur
Dedans la gayne de sa misericorde
Je vous prie donc que vostre veu s’acorde
A cheminer par vraye humilité
Soubz qui a Jhesus pour nous milité
Chaussons le pied d’humilité sans fainte
Laissons orgueil qui trop de maulx procurre
Ceste panthouffle nous sera digne & saincte
Humilité nous soit de tremeur ceincte
Car qui craint Dieu il n’a de pecher cure
Humilité est de telle nature
Que Dieu se joingt la ou elle est nourie
La Trinité & la vierge Marie