Je suis Rayson princesse de vertus
de tout honneur la nourrice & la mere.
par mon fait sont les vices abatus
et cueurs humains de grace revestus
pour militer contre folie amere
il n'est engin tant soit tule ou omere
qui puist avoir de bonnes meurs foyson
s'il ne joÿst du saige de rayson
Je viens a toy O faulcon ignorant
povre de sens/ privé de sapience
Je viens a toy legierement courant
car j'ay pitié quant je te vois mourant
par folle erreur et par impacience
tu peuz penser que ce n'est pas science.
de demourer en dangereux pas
l'omme discret chemine par compas
Comment euz tu couraige ou hardiesse
de desployer le regart de tes yeulx
sur la beaulté/ sur la clere jeunesse.
sur le leurre/ sur la belle richesse.
du faulconnier qui te cerche en tous lieux
certes faulcon tu devois pour le mieulx
garder honneur/ vergongne et ignorance
pour les deux yeux entre concupiscence
Tu as commis non pas ung simple vice
mais deux forfais par ta grant lacheté.
tu es entré en l'amoureux service
premierement par traict d'avarice.
secondement pour querre volupté.
et se tu dis que toute honnesteté
tu as trouvé au faulconnier begnin
devers la queuhe est tousjours le venin
Quelle est la fin ou les amoureux tendent
en poursuyvant leur amoureuse queste
quel est le bien & grace qu'il attendent.
quant tous les jours s'esforcent & contendent
de parvenir a gaing ou a conqueste.
l'un se complaint l'autre fait sa requeste.
mais je te dis qu'aprés melencolye.
la fin d'amours n'est que toute folye
Combien qu'on peut arguer sur ce point.
que par amour on entre en mariage.
pourtant amour blasmer ne se doit point
car on accquiert par fine amour qui point
le secrement qui augmente lignage.
les amoureux plains de subtil langaige.
font de telz motz leur targe & leur pavois
mais pour ung bon dix en est de mauvais
Cent mille maulx par amours sont venus
tous divers cas & dangiers inhumains.
troyens en sont en cendres devenus.
maulgré priam/ hector ou helenus.
par grecz puissans qui y mirent les mains
fureur d'amours fist jadis aux romains.
femmes ravir et les sabines prendre.
ardant desir fait maint mal entreprendre
Bien fut pugny apius claudius
quant il cuida virgine violer
pareillement dit tytus livius.
qu'on exilla le filz tarquinius
quant par force vint lucrece acoler.
mais qui vouldroit les livres recoler.
on trouveroit exemples largement
folz amoureux n'ont point d'entendement.
En son jardin susanne se lavoit.
quant des viellars cuida estre grevee
et bersabé nouvelles ne sçavoit
du Roy david qui espié l'avoit
quant elle estoit en sa chambre privee.
mieulx eust valu qu'elle se fust lavee.
les huys fermés pour tous maulx evader
on ne se peut trop seurement garder
Femme se doit honnestement tenir
de beau maintien de simple contenance
peu se monstrer/ peu aller peu venir.
qu'elle ne puist a honte parvenir
en frequentant trop diverse acointance
et de dyna doit avoir souvenance.
qui trop ala dont elle fut ravie
On doit amer honneur comme sa vie.
Note ces motz O faulcon esgaré.
note ces motz & saigement te garde
de retourner soies tout preparé:
pour ton honneur estre mieulx reparé.
affin que nul en mal ne te regarde:
ne doute rien prens moy pour sauvegarde
je te seray confort conseil et dame
qui veult bien faire il ne doit doubter ame
Repren ton vol par devers les oyseaux
que tu lessas par folle insipience
tu ne craindras ne les vens ne les eaux
bestes ne gens dames ne damaiseaux.
quant tu auras necte la conscience
encline toy soubz humble obedience
vis scelon dieu garde toy desormais.
Amendement vault mieulx tart que jamaiz
Quant dame raison eut faicte ceste profitable exhortacion elle tint
silence pour ung tandis & se monstra toute deliberee de Ramener le
faulcon ou chasteau le remetre en son premier lieu Et restituer en son
premier honneur. Lequel faulcon voyant la bonne affection de raison &
pesant a la balance les beaulx motz qu'elle avoit proferés Considerant
aussi que ne pouoit mieulx faire que croire son bon conseil. determina/
promist et proposa/ Retourna incontinent se mettre en tout devoir &
diligence & faire a son bon pouoir comme se le cas ne fust point advenu
Non pas qu'il en veuille mespriser ou prendre en hayne le fauconnier car
il ne sçaroit: Mais le veult tant qu'il vivra louer exaulcer & aymer en
tout honneur/ discrecion & bonne significacion Et ainsi combien que le
faulconnier a la subjection de cupido dieu d'amours s'efforçast de
querir sercher & reclamer le faulcon. Pour de plus en plus consolider &
entretenir la premiere acointance: Toutesfois par la bonne industrie ou
sollicitude de raison furent long temps sans aprocher/ sans veoir l'un
l'autre & conferer ensemble Je ne sçay qu'il advint aprés