"Oh, will ye walk the wood wi' me?
Oh, will ye walk the green?
Or will ye sit within mine arms,
My ain kind Jean?"
"It 's I 'll not walk the wood wi' thee,
Nor yet will I the green;
And as for sitting in your arms,
It 's what I dinna mean."
"Oh! slighted love is ill to thole,
And weel may I compleen;
But since that better mayna be,
I e'en maun thol 't for Jean."
"Gang up to May o' Mistycleugh,
Ye saw her late yestreen;
Ye'll find in her a lightsome love
Ye winna find in Jean."
"Wi' bonny May o' Mistycleugh
I carena to be seen;
Her lightsome love I'd freely gie
For half a blink frae Jean."
"Gang down to Madge o' Miryfaulds,
I ken for her ye green;
Wi' her ye 'll get a purse o' gowd--
Ye 'll naething get wi' Jean."
"For doity Madge o' Miryfaulds
I dinna care a preen;
The purse o' gowd I weel could want,
If I could hae my Jean."
"Oh, yes! I 'll walk the wood wi' thee;
Oh, yes! I 'll walk the green;
But first ye 'll meet me at the kirk,
And mak' me aye your Jean."