WEE JIM.

Wha is't that toddles oot an' in?

Wee Jim.

An' wha when cross kicks up a din?

Wee Jim.

Wha, when he's pleased, wi' lauchin' e'e,

Comes rinnin' frae his mither's knee

An' distributes his kisses free?

Wee Jim.

Wha is't that has a curly pow?

Wee Jim.

Wha sets his granny's hearth alowe?

Wee Jim.

Wha, when in mischief or in fun

Mak's face an' han's as black's the lum',

Is threatened wi' a skelpit bum?

Wee Jim.

Wha fills his tummy fu' o' sweets?

Wee Jim.

An' then in pain sits doon an' greets?

Wee Jim.

Wha, when he's sufferin' wi' the bile,

Through a' his pain tries hard tae wile

Awa' the dose o' castor ile?

Wee Jim.

Wha rins aboot wi' naughty boys?

Wee Jim.

Wha listens words o' graceless choice?

Wee Jim.

Wha, like a parrit when he hears,

Repeats their slang, an' a' their sweirs,

An' dins them in his mither's ears?

Wee Jim.

Wha is't we lo'e sae awfu' dear?

Wee Jim.

An' wadna' tyne for gowd or gear!

Wee Jim.

What though he romps, an' sometimes cries,

Pure innocence beams in his eyes:

He's jist an angel frae the skies!

Wee Jim.