"_OOR DOCTOR._"
Come a' wha leeve in Wanlockheid
An' murn wi' me, oor Doctor's deid:
Nae mair he'll cheer us on oor way,
Nae mair he'll spiel the Gow'scaures brae
Tae his loved hame amang the flooers.
Whaur he did spen' his leisure oors--
Oors that were few an' far between,
For sair he toiled frae morn till e'en
Tae free his patients frae their pain
An' mak' the broken hale again;
Wi' muckle skill he tent us a'
Wi' equal care, baith great an' sma'.
A kin'ly hert beat in his breast,
His love was great for man an' beast;
Aye ready Fortune's smile tae share,
The freen an' champion o' the puir.
On Nature's charms he looked wi' joy,
An' earnest seekers did employ
Wha gethered frae the mine an' glen
Mony a flooer an' mineral gem.
He had his fau'ts, we hae nae doot;
What mortal ever leeved withoot?
They were sae sma' we couldna' scan
Them through the virtues o' the man.
An' noo his earthly coorse is run;
Nae mair he'll see the settin' sun,
An' watch frae aff the mountain's hicht
Day's glory deein' intae nicht.
The loss is oors; we murn fu' sair:
Maybe his like we'll see nae mair;
Till death's dark shadow dims the e'e
Oor Doctor will remembered be.