Le procureur[5] remonstre qu'il a receu ung pacquet de lettres du roy
touchant le traficq du Canada qu'il a aparues et d'icelles lecture en a
esté faicte, après laquelle lecture les avys ayant esté pris sur le
contenu desd. lettres, a esté conclud qu'elles seront insérées au
présent registre, ce qui sera faict après l'expédition des conclusions
de ceste assemblée, où a esté conclud que led. sieur procureur escrira à
Bertrand Lefer Lymonnay, deputé à la court pour les affaires de ceste
cité, et luy envoirra coppye desd. lettres pour fere remonstrance à Sa
Majesté le peu d'importance que led. trafficq de Canada aporte au
général de ceste ville, laquelle n'entend y fere aucuns fraiz,
delaissant la porsuilte à estre faicte par les particuliers de lad.
ville qui y traficquent journellement, comme aussy qu'il sera escrit à
monseigneur l'amiral et pour cest effect, led. procureur commis.
[Note 5: Thomas Porée des Chesnes.]