Ye mauna be proud, although ye be great,
The puirest bodie is still your brither;
The king may come in the cadger's gate--
Ae gude turn deserves anither.
The hale o' us rise frae the same cauld clay,
Ae hour we bloom, ae hour we wither;
Let ilk help ither to climb the brae--
Ae gude turn deserves anither.
The highest among us are unco wee,
Frae Heaven we get a' our gifts thegither;
Hoard na, man, what ye get sae free!--
Ae gude turn deserves anither.
Life is a weary journey alane,
Blithe 's the road when we wend wi' ither;
Mutual gi'ing is mutual gain--
Ae gude turn deserves anither.