NAEBODY'S BAIRN.

She was Naebody's bairn, she was Naebody's bairn,

She had mickle to thole, she had mickle to learn,

Afore a kind word or kind look she could earn,

For naebody cared about Naebody's bairn.

Though faither or mither ne'er own'd her ava,

Though rear'd by the fremmit for fee unco sma',

She grew in the shade like a young lady-fern,

For Nature was bounteous to Naebody's bairn.

Though toited by some, and though lightlied by mair,

She never compleened, though her young heart was sair,

And warm virgin tears that might melted cauld airn

Whiles glist in the blue e'e o' Naebody's bairn.

Though nane cheer'd her childhood, an' nane hail'd her birth,

Heaven sent her an angel to gladden the earth;

And when the earth doom'd her in laigh nook to dern,

Heaven couldna but tak again Naebody's bairn.

She cam smiling sweetly as young mornin' daw,

Like lown simmer gloamin' she faded awa,

And lo! how serenely that lone e'ening starn

Shines on the greensward that haps Naebody's bairn!