The breath o' spring is gratefu',
As mild it sweeps alang,
Awakening bud an' blossom
The broomy braes amang,
And wafting notes o' gladness
Frae ilka bower and tree;
Yet the bonnie Redesdale lassie
Is sweeter still to me.
How bright is summer's beauty!
When, smilin' far an' near,
The wildest spots o' nature
Their gayest livery wear;
And yellow cups an' daisies
Are spread on ilka lea;
But the bonnie Redesdale lassie
Mair charming is to me.
Oh! sweet is mellow autumn!
When, wide oure a' the plain,
Slow waves in rustlin' motion
The heavy-headed grain;
Or in the sunshine glancin',
And rowin' like the sea;
Yet the bonnie Redesdale lassie
Is dearer far to me!
As heaven itsel', her bosom
Is free o' fraud or guile;
What hope o' future pleasure
Is centred in her smile!
I wadna lose for kingdoms
The love-glance o' her e'e;
Oh! the bonnie Redesdale lassie
Is life and a' to me!