_Fu proverbejo stascionato de chille de la maglia antica, che chi
cerca chello, che non deve, trova chello, che non vole; e cchiara
cosa è, che la Scigna pe cauzare li stivale restaje ’ncappata pe lo
pede, comme soccesse a na schiava pezzente, che non avenno portato
maje scarpe a li piede, voze portare corona ’ncapo; ma perchè
tutto lo stuorto ne porta la mola, e una vene, che sconta tutte:
all’utemo, avennose pe mmala strata osorpato chello, che toccava
ad autro, ’ncappaje a la rota de li cauce, e quanto se n’era cchiù
sagliuta ’mperecuoccolo, tanto fu maggiore la vrociolejata, de la
manera, che ssecota._
Dice, ch’era na vota lo Rrè de Valle pelosa, lo quale aveva na figlia
chiammata Zoza, che ccomme n’autro Zoroasto, o n’autro Aracreto
non se vedeva maje ridere, pe la quale cosa lo scuro Patre, che non
aveva autro spireto, che st’uneca figlia, non lassava cosa da fare
pe llevarele la malanconia, facenno venire a provocarele lo gusto,
mo chille che camminano ’ncoppa a le mmazze, mò chille, che ppassano
drinto a lo circhio, mò li mattacine, mò mastro Roggiero, mò chille che
ffanno juoche de mano, mò le forze d’Ercole, mò lo cane ch’addanza,
mò vracone che ssauta, mò l’Aseno, che beve a lo becchiero, mò Lucia
canazza, e mò na cosa, mò n’autra: ma tutto era tiempo perduto, ca
manco lo remmedio de masto Grillo, manco l’erva Sardoneca, manco
na stoccata a lo diaframma l’averria fatto sgrignare no tantillo la
vocca: tanto che lo povero Patre pe ttentare l’utema prova, non sapenno
autro, che fare, dette ordene, che se facesse na gran fontana d’uoglio
nnante la porta de lo Palazzo co ddesigno, che sghizzanno a lo ppassare
de la Gente, che facevano comm’a fformiche lo vacaviene pe cchella
strata, pe non se sodognere li vestite averriano fatte zumpe de Grillo,
sbauze de Crapejo, e ccorzere de Leparo, sciulianno, e ’mmorrannose
chisto, e cchillo, potesse soccedere cosa, pe la quale le scappasse
a rridere. Fatta addonca sta Fontana, e stanno Zoza a la fenestra,
tanto composta, ch’era tutta acito, venne a sciorta na vecchia, la
quale azzoppanno co na spogna l’uoglio, ne ’nchieva n’agliariello,
ch’aveva portato: e mmentre tutta affaccennata faceva sta marcangegna,
no cierto tentillo paggio de corte, tiraje na vrecciolla, accossì a
ppilo, che cogliuto l’agliaro, nne fece frecole; per la quale cosa la
vecchia, che non aveva pilo a la lengua, nè portava ’ngroppa, votatase
a lo paggio, comenzaje a ddirele. Ah zaccaro, frasca, ’merduso,
piscialietto, sautariello di zimmaro, pettola ’nculo, chiappo de mpiso,
mulo canzirro, ente ca pure li pulece hanno la tosse, và che te venga
cionchìa, che mmammata nne senta la mala nova, che non ce vide lo
primmo de Maggio, và che te sia data lanzata catalana; o che te sia
data stoccata co na funa, che non se perda lo sango, che te vengano
mille malanne, co l’avanzo, e ppresa, e biento a la vela, che se ne
perda la semmenta, guzzo, guitto, figlio de ’ngabellata, marejuolo.
Lo fegliulo, ch’aveva poco varva, e mmanco descrezzione, sentennose
fare sta ’nfroata de zuco, pagannola de la stessa moneta, le disse:
Non vuò appilare ssa chiaveca, vava de parasacco, vommeca vracciolle,
affoca peccerille, caca pezzolle, cierne vernacchie? la Vecchia, che se
sentette la nova de la casa soja, venne ’ntanta zirria, che perdenno la
usciola de la freoma, e scapolanno da la stalla de la pacienzia, auzato
la tela de l’apparato, fece vedere la scena voscareccia, dove potea
dire Sirvio: ite sveglianno gli occhi col corno: lo quale spettacolo
visto da Zoza, le venne tale riso, ch’appe ad ascevolire. La Vecchia
vedennose dare la quatra, venne ’ntanta arraggia, che votato na cera
da sorrejere verzo de Zoza, le disse: va che non puozze vedere maje
sporchia de marito, se non piglie lo Prencepe de Campo retunno. Zoza,
che sentette ste pparole, fece chiammare la Vecchia, e boze sapere
ad ogne cunto, se l’aveva ’ngiuriata, o jastemmata, e la Vecchia
respose ora sacce, ca sto Prencepe, che t’aggio mentovato è na pentata
criatura, e chiammato Taddeo, lo quale pe na jastemma de na Fata,
avenno dato l’utema mano a lo quatro de la vita, è stato puosto drinto
na sebetura, fora le mmura de la Cetate, dov’è no spettaffio scritto
a na preta, che qualesevoglia femmena che ’nchiarrà de chianto ’ntre
ghiuorne na lancella, che llà mmedesemo stace appesa a no crocco, lo
farrà resorzetare, e pigliarrà pe mmarito: e perchè è ’mpossibele,
che duje uocchie omane pozzano piscioliare tanto, che facciano zeppa
na lancella accossì granne, che leva miezo staro, si non fosse, commo
aggio ’ntiso dicere, chella Geria, che se fece a Romma Fontana de
lagreme: io pe vedereme delleggiata, e coffiata da vuje, v’aggio data
sta jastemma, la quale prego lo Cielo, che te venga a colà pe mmennetta
de la ’ngiuria, che mm’è stata fatta. Accossì decenno, sfilaje pe
le grade a bascio pe paura de quarche ’ntosa. Ma Zoza a lo mmedesemo
punto rommennanno, e mmazzecanno le pparole de la Vecchia, le trasette
a la cecotena, a la catarozzola, e botato no centimmolo de penziere,
e no molino de dubbie sopra sto fatto, all’utemo tirata co no straolo
da chella passione, che cceca lo jodizio, e ’ncanta lo descurzo
dell’ommo, pigliatose na mano de scute da lo scrigne de lo Patre,
se ne sfilaje fora de lo Palazzo, e tanto camminaje, che arrivaje
a no Castiello de na Fata, co la quale spaporanno lo core, essa pe
ccompassione de accossì bella Giovane, a la quale erano duje sperune a
ffarela precepetare, e la poca ajetate, e l’ammore sopierchio a cosa
scanosciuta, le deze na lettera de raccommannazione a na sore soja
puro fatata: la quale fattole gran compremiento, la matina, quanno la
notte fa jettare lo banno dall’Aucielle, a chi avesse visto na ’morra
d’ombre negre sperdute, che se le farrà no buono veveraggio, le dette
na bella noce decenno: Te figlia mia tienela cara, ma non l’aprire
maje, si no a tiempo de grande abbesuogno, e co n’autra lettera
l’arrecomannaje a n’autra sore: dove dapò luongo viaggio arrivata, fu
recevuta co la medesema ammorosanza, e la mattina appe n’autra lettera
all’autra sore, co na castagna, dannole lo stisso avvertimento, che
le fu dato co la noce, e da po avere cammenato, jonze a lo Castiello
de la Fata, che ffattole mille carizze, a lo ppartirese la matina, le
consegnaje na nocella co la stessa protesta, che non l’apresse maje,
se la necessetà no la scannava. Avuto ste cose Zoza, se mese le gamme
’ncuollo, e tanta votaje paise, tanta passaje vuosche, e sciommare,
che dapò sett’anne appunto, quanno lo Sole ha puosto sella pe correre
le ssolete poste, scetato da corvette de li Galle, arrivaje quase
scodata a campo retunno, dove primma, che trasire a la Cetate, vedde
na sebetura de marmoro a pede na Fontana, che pe vederese drinto no
cremmenale de porfeto, chiagneva lagreme de cristallo, da dove levato
la Lancella, che nc’era appesa, e postasella ’nmiezo a le gamme,
commenzaje a ffare li duje simmole co la Fontana: e non auzanno maje
la capo da lo voccaglio de la Lancella, tanto che ’nmanco termene
de duje juorne, era arrivata doje deta sopra lo cuollo, che non ce
mancavano doje autre deta, e era varra. Ma pe ttanto trivoliare,
essendo stracqua, fu non volenno, gabbata da lo suonno, de manera, che
fu costretta d’alloggiare no paro d’ore sotto la tenna de le perpetole,
fra lo quale tiempo na certa Schiava gamme de grillo, venenno spisso
a ’nchire no varrile a cchella Fontana, e ssapenno la cosa de lo
spettaffio, che se ne parlava pe ttutto, comme vedde chiagnere tanto
Zoza, che ffaceva duje piscericole de chianto, stette facenno sempe
le guattarelle, aspettanno, che la lancella stesse a buon termene,
pe guadagnarele de mano sto bello riesto, e ffarela restare co na
vranca de mosche ’n mano; e comme la vedde addormuta, servennose de
l’accasione, le levaje destramente la lancella da sotta, e ppuostoce
l’uocchie ’ncoppa ’nquattro pizzeche la sopranchiette, ch’a ppena fu
rrasa, che lo Prencepe comme se se scetasse da no gran suonno, s’auzaje
da chella cascia de preta janca, e s’afferraje e cchella massa de
carne negra, e ccarriannola subeto a lo Palazzo sujo, facenno feste,
e lummenarie de truono, se la pigliaje pe mmogliere. Ma scetata, che
fu Zoza, e trovanno jettata la lancella, e co la lancella le speranze
soje, e bisto la cascia aperta, se le chiuse lo core de sciorta, che
stette ’mpizzo de sballare li fangotte de l’arma a la doana de la
morte: all’utemo vedenno ca a lo male sujo no nc’era remmedio, e che
non se poteva lamentare d’autro che de l’uocchie suoje, che avevano
male guardato la vitella de le speranze soje, s’abbiaje pede catapede
drinto la Cetate, dove ’ntiso le ffeste de lo Prencepe, e la bella
razza de mogliere, che aveva pigliato, se ’magenaje subeto, comme
poteva passare sto negozio, e ddisse sospiranno, che doje cose negre
l’avevano posta ’nchiana terra: lo suonno, e na schiava; pure pe
ttentare ogne cosa possibele contro la morte, da la quale se defenne
quanto cchiù pò ogne anemale, pigliaje na bella casa faccefronte lo
Palazzo de lo Prencepe, da dove non potenno vedere l’Idolo de lo core
sujo, contemprava a lo mmanco le mmura de lo Tempio, dove se chiudeva
lo bene, che ddesederava. Ma essenno vista no juorno da Taddeo, che
comm’a sporteglione volava sempre ’ntuorno a chella negra notte de
la Schiava, deventaje n’Aquila ’ntenere mente fitto ne la perzona de
Zoza, lo scassone de li privilegie de la natura, e lo fora mine ne
chiammo de li termene de la bellezza, de la quale cosa addonatose la
schiava fece cose dell’autro munno: ed essenno già prena de Taddeo,
menacciaje lo marito decenno: _se fenestra no levare, mi punia a ventre
dare, e Giorgetiello mazzoccare_. Taddeo, che steva cuocolo de la
razza soja, tremmanno comm’a ghiunco, de darele desgusto, se scrastaje
comm’arma da lo cuorpo de la vista de Zoza, la quale vedennose levare
sto poco de sorzico a la debolezza de le speranze soje, non sapenno,
che partito pigliare a sto astremo abbesuogno, le vennero a mmente
li duone de le Ffate, ed aprenno la noce ne scettero no ’naimuozzo
quanto a no Pipatiello, lo cchiù saporito scaramennisso, che fosse
stato maje visto a lo munno; lo quale, puostose ’ncoppa a la fenestra,
cantaje co tanta trille, gargariseme, e passavolante, che pareva no
compà Junno, nne passava Pizzillo, e lo Rrè de l’Aucielle, lo quale
visto, e ssentuto a ccaso da la schiava, se ne ’mprenaje de manera,
che chiammato Taddeo, le disse: _si no avere chilla piscinosa, che
cantare, mi punia a ventre dare, e Giorgetiello mazzoccare_. Lo
Prencepe, che s’avea fatto mettere la varda da bemaguallà, mannaje
subeto a Zoza, se ’nce lo voleva vennere; la quale respose, che n’era
mercantessa, ma che se voleva ’nduono, se lo pigliasse, ca ne le faceva
no presiento. Taddeo, che allancava pe ttenere contenta la mogliere,
azzò le portasse a luce lo partoro, azzettaje l’offerta: ma da llà a
quatto autre juorne Zoza aperta la castagna, ne scette na Voccola co
dudece Polecine d’oro, li quale puoste ’ncoppa la medesema fenestra, e
biste da la schiava, ne le venne golio dall’ossa pezzelle, e cchiammato
Taddeo, e mostratele accossì bella cosa, le disse: _si chilla Voccola
no pigliare, mi punia a ventre dare, e Giorgetiello mazzoccare_, e
Taddeo, che se lassava pigliare de filatielle, e ghiocare de coda da
sta perra cana, mannaje de nuovo a Zoza, offerennole quanto sapesse
addemmannare pe priezzo de accossì bella Voccola, da la quale appe
la stessa resposta de primmo, che ’nduono se l’avesse pigliata,
ca pe termene de vennetta ’nce perdeva lo tiempo: e isso, che non
poteva farene de manco, fece dare da la necessetà mazzafranca a la
descrezzione; e scervecchiannone sto bello voccone, restaje ammisso
da la liberaletà de na femmena, essenno de natura tanto scarzogne, che
no le vastarriano tutte le verghe, che beneno dall’India. Ma passanno
autre tante juorne, Zoza aprette la nocella, da la quale scette fora na
pipata, che filava oro, cosa veramente da strasecolare, che non accossì
ppriesto fu posta a la medesima fenestra, che la schiava datoce de
naso chiammaje Taddeo, decennole; _si pipata non accattare, mi punia a
ventre dare, e Giorgetiello mazzoccare_, e Taddeo, che se faceva votare
comm’Argatella, e tirare pe lo naso da la soperbia de la mogliere, da
la quale s’aveva fatto accavallare, non avenno core de mannare pe la
Pipata a Zoza, nce voze ire de perzona, arrecordannose de lo mutto,
non c’è mmeglio misso, che te stisso; chi vole vaga, e chi non vole
mauna, e chi pesce vole rodere, la coda se vò nfonnere, e pregatola
grannemente a perdonare la mpertenenzia soja pe li sfiole de na prena,
Zoza che ne se jeva ’nsecoloro co la causa de li travaglie suoje,
facette forza a sse stessa de lassarese strapregare pe trattenere la
voca, e gaudere cchiù tiempo de la vista de lo Segnore sujo, furto
de na brutta schiava, all’utemo dannole la pipata, comm’avea fatto de
ll’autre ccose, primma che nce la conzegnasse, pregaje chella cretella,
ch’avesse puosto ’n core a la schiava de sentire cunte. Taddeo, che
se vedde la pipata ’n mano, e senza sborzare uno de ciento vinte a
ccarrino, restanno ammisso de tanta cortesia, l’afferze lo stato, e
la vita ’ncagno de tante piacire, e ttornato a lo Palazzo, dette la
pipata a la mogliere, che non accossì priesto se la mese ’nzino pe
joquaresenne, che parze n’ammore ’nforma d’Ascanio ’nzino a Dedone, che
le mese lo ffuoco ’mpietto, pocca le venne accossì ccaudo desederio de
sentire Cunte, che non potenno resistere, e dobbetanno de toccarese
la vocca, e de fare no figlio che ’nfettasse na nave de pezziente,
chiammaje lo marito, e le disse: _si no venire gente, e Cunte contare,
mi punia a ventre dare, e Giorgetiello mazzoccare_. Taddeo pe levarese
sta cura de Marzo da tuorno fece subbeto jettare no banno, che tutte le
ffemmene de chillo pajese fossero venute lo tale juorno, ne lo quale a
lo spontare de la stella Diana, che sceta ll’Arba ad aparare le strate
pe ddove ha da passare lo Sole, se trovaro tutte a lo luoco destenato.
Ma non parenno a Taddeo de tenere tanta marmaglia ’mpeduta pe no
gusto partecolare de la mogliere, otrache s’affocava de vedere tanta
folla, nne scegliette solamente dece de le mmeglio de la Cetate, che
le parzero cchiù provecete, e pparlettere, che fforo Zeza scioffata,
Cecca storta, Meneca vozzolosa, Tolla nasuta, Popa scartellata,
Antonella vavosa, Ciulla mossuta, Paola sgargiata, Ciommetella zellosa,
e Ghiacova squaquarata, le quale scritte a na carta, e llecenziate
ll’autre, s’auzaro co la schiava da sotta a lo bardacchino, e s’abbiaro
palillo palillo a no giardino de lo Palazzo stisso, dove li ramme
fronnute erano accossì ntricate, che no le ppoteva spartire lo Sole co
la pratteca de li ragge, e ssedutose sotto no paveglione commegliato de
na pergola d’uva, ’nmiezo a lo quale scorreva na gran fontana, Mastro
de Scola de le Cortesciane, che le ’mezzava ogne ghiuorno de mormorare,
commenzaje Taddeo accossì a pparlare.
Non è cchiù ccosa groliosa a lo munno, magne femmene meje, quanto
lo ssentire li fatte d’autre; nè senza ragione veduta, chillo gran
Felosofo mese ll’utema felecetate de ll’ommo ’nsentire cunte graziuse,
pocca ausolianno cose de gusto, se spapurano l’affanne, se dà sfratto
a li penziere fastidiuse, e s’allonga la vita; pe lo quale desederio
vide ll’Artisciane lassare li funnache, li Mercante li trafeche, li
Dotture le ccause, li Potecare le ffaccenne, e banno canne apierte pe
le Barvarie, e pe li rotielle de li Chiacchiarune sentenno novellanze,
avise ’nmentate, e gazzette nn’airo. Pe la quale cosa devo scusare
moglierema, che s’ha schiaffato ’n capo st’omore malenconeco de
sentire cunte; e pperzò se ve piace de dare ’mbrocca a lo sfiolo de
la Prencepessa mia, e dde cogliere ’nmiezo a le boglie meje, sarrite
contente pe sti quatto, o cinco juorne, che starrà a scarrecare la
panza, de contare ogne ghiornata no cunto ped’uno de chille appunto,
che ssoleno dire le Becchie pe ttrattenemiento de li peccerille,
trovannove sempe a sto luoco stisso, dove, dapò avere ngorfuto, se
darrà prencipio a cchiacchiariare, termenannose la jornata co quarche
Egroca, che se recetarrà da li medeseme sfrattapanelle nuostre,
pe ppassare allegramente la vita, e tristo chi more. A ste pparole
azzettaro tutte co la capo lo commannamiento de Taddeo; fra tanto poste
le ttavole, e benuto lo mazzecatorio, se mesero a magnare; e ffornuto
de gliottere, fece lo Prencepe nsegnale a Zeza scioffata, che desse
fuoco a lo piezzo, la quale fatta na granne ’ncrinata a lo Prencepe, e
a la mogliere, accossì commenzaje a pparlare.