Fy studentis clens your myndes of this cryme
Gyue ones your hertis to parfyte dylygence
Howe longe in Idelnes, wyll ye lese your tyme
In pryde and ryot, with all other offence
Alas what profyte get ye by neglygence
But spende your goodes in all iniquyte
And where your frendes thynke, ye labour for scyence:
Ye lese your tyme bryngynge them to pouertee
Leue of suche stody as is vnprofytable
Without fruyte outher godly discyplyne
And gyue your myndes to scyences lawdable
Where ye may your herte set and inclyne:
To Arystotyls or Platoys doctryne
And nat alway on logyke or Sophestry
I wyll nat say but it is a thynge dyuyne
And moche worth to knowe Phylosophy
* * * * *
Of them that folysshly speke agaynst
the workes of god.
[Illustration: Here note we fowlys whiche can nat be content
With goddes worke, and ordynaunce dyuyne
Thynkynge theyr owne wyll moche more expedyent
Nat wyllynge theyr myndes to his wyll to enclyne
But suche folys often sholde come to ruyne
And wo with sorowe and losse sholde they fynde
If god sholde conforme his workes to theyr mynde]
He is a fole and laboreth in vayne:
Whiche with small brondes of fyre flamynge bryght
Entendyth with laboure besynes and payne
Of the shynynge sonne for to encrease the lyght
Suche one assayeth a thynge passynge his myght
And is a fole to set thought or delyte
To mende that thynge whiche god hath made perfyte
But yet is he a moche gretter fole truely
Whiche wyll correct that thynge whiche god hath done
And doth nat his herte his wyll and mynde aply
To goddes workes and deuyne prouysyon
Of all other maddest is his condycion
And more frantyfe forsoth I may hym call
Than they that ar vext with furyes infernall:
(Thou fole) the myght of god omnipotent
In vertue and wysdome so largely doth extende
His maiesty, and power is so excellent
His glorious godhede his workes doth defende
So that no mortall man can them amende
Wenest thou mad fole that thou amende cannest ought
That he hath done: whiche made all thynge of nought
He that hath made the heuen and firmament
The londe, the se, and euery other thynge
Is so discrete, so wyse, and prouydent
Before his presence parfytely seynge
All thynge to come that neuer hath had beynge
His workes and dedys ar so perfyte and ryght
That none can increas nor yet decreas his myght
He doth all thynge dispose moderate and dispence
Knowynge our mynde, and what is to vs most mete
All thynge is open and playne in his presence
Our inwarde thought must he nedes knowe and wete
And euery fortune is playne before his fete
He hath all thynge by lawe and order drest
And doth no thynge but it is for the best
Therfore whether he gyue thunder snowe or rayne
Wynde or wether, tempest or tourment
Frost lyghtnynge, fayre wether, outher storme sodayne
Mystes or clowdes, yet man sholde be content
And nat with worde nouther inwarde intent
Agaynst god grutche, but euery day and houre
Magnyfye the dedys of god his creatoure
It were moche better thou fole that thou were dome
Than to cast lewde wordes agaynst thy lorde in vayne
Thou fole he worketh no thynge but by wysedome
And yet art thou nat content but dost complayne
Thou sekest vengeaunce (for thy synne) and payne
In hell for euer, thynkynge thy selfe so wyse
To teche thy god, and his warke to dispyse
It is nat lawfull for any, hye nor lowe
To be so bolde so blynde or so cruell
Grutchynge wordes agaynst his god to throwe
Thughe to theyr plaseour a thynge nat fortune well
Take example by the children of Israell
Whiche oft for this synne suffred great payne and wo
Slayne and distroyed, so haue ben many mo
Many a lewde body without wysdome or rede
Grutche in theyr myndes, and openly do blame
Almyghy god, whan theyr children ar dede
Where rather they ought to enioye of the same
For it myght fortune that great rebuke and shame
Myght to theyr frendes haue come by theyr synne and cryme
Soone after: if they had nat dyed at that tyme
Wherfore this one clause is my conclusyon
That god our maker is wyse and prouydent
Blame nat his workes by thyne abusyon
For all that he doth is for the best intent
But if that god sholde alwaye assent
To our desyres and euer perfourme our wyll
Our owne requestis sholde tourne vs to great yll