Le chevalier.
Dix commandemens fait.
amours a ses sergans.
ausquelz tout cuer parfait.
doit estre obeissant.
La damoiselle.
O sire chevalier. et combien que aincoires fust l'heure plus tard et que
je deusse icy arrester oultre les autres. et si veuil de vous oyr ces
sains commandemens voyre et que ce soit vostre plaisir les me dire.
Le chevalier.
Les .x. commandemens d'amours.
C'est que l'amant d'orgueil. soit exemps en tous temps/
ja parolle ne dye qui autruy soit nuisans.
A tous soit acointables de parler et plaisans.
Et toutes villonniez soit partout eschevans.
D'estre faittis et cointes doit tousjours estre engrans.
en toutes compaignies soit et liez et joyans.
Nul villain mot ne soit hors de sa bouche yssans.
Soit larges et courtois aux petis et aux grans.
Et en un seul lieu soit son cuer perseverans.
Qui ces commandemens ne garde il n'est pas vrays amans.
Ne digne des grans biens d'amours participans.
La damoiselle.
Certainement bien doivent estre hault exaulciez ceulx qui ces sains
commandemens acomplissent. mais sire chevalier aincores volentiers
sauroie de vous pour congié prendre comment on appelleroit amours
s'elles avoient perdu leur nom
Le chevalier.
Damoiselle sachiez qu'elles auroient nom. Tresor d'honneur pour la
plushaulte et parfaitte chose qui soit ou monde et qui plus fait le
monde durer et continuer ensemble.
Aincoires ay dessus mon cuer aucunes doubtes que avant que departons me
convient de vous savoir. damoiselle si vous prie que ne vous veuille
desplaire de la paine que je vous donne. et aprés vostre response je
vous promés imposer fin et ne vous plus traveillier.