Sire chevalier moult de joyeuses demandes m'avez faites ausqueles assez
simplement et en brief je vous ay respondu si me pardonnez que si
ruidement l'ay couchié/ car mieulx ne le sçay. et on dist encommun que
qui fait le mieulx qu'il scet et qu'il puet on lui doit pardonner Or me
pardonnez doncques/ et me satisfaittes a aucunes doubtes sur certaines
demandes que aincoires vous veuil demander esqueles je croy vous estre
expert mieulx que ne soyons entre nous femmelettes et n'ayez en desdaing
ou despit quant si franchement vous empesche/ mais autant en avez de moy
quant temps et lieu le vous semondront
Le chevalier.
Gentille damoiselle moult me plaist la franchise que dittes prendre et
avoir sur moy/ car bien le povez dire et faire a vostre bon plaisir
comme il vous poura aparoir cy aprés. Or commenciez quant vous plaira et
je de mon petit sens et sans riens vous en celer diray a la france
margarite ce que en moy en est
La damoiselle.
Sire chevalier je vous demande se vous aviez l'ottroy de vostre amie
d'estre dix fois en sa compaignie a vostre volenté et jamais plus n'y
deussiez estre se vous les prenderiez en brief temps ou se vous
attenderiez longuement.
Le chevalier.
Damoiselle sachiez que je en prenderoie aucunes prestement et les autres
garderoie. Car se je les avoie toutes prinses a une fois je devroie
estre dolant quant si legierement auroie despendu les biens que madame
m'auroit de sa grace otroiez et n'y porroie plus recouvrer.
La damoiselle.
Sire chevalier je vous demande se vous aviez l'ottroy de vostre amie de
couchier avec elle par tel sy qu'elle deust avoir sur vous un souhait
tel qu'il lui plairoit lequel ameriez vous mieulx ou qu'elle le prist a
vostre couchier. ou a vostre lever.
Le chevalier.
Certes damoiselle mieulx ameroie qu'elle le preist au couchier. Car puis
qu'elle m'aroit ottroié tele grace que d'estre la nuit emprés elle je
pourroie bien penser que son souhait ne seroit point contraire a ma
volenté. mais a mon avantaige et honneur.
La damoiselle.
Sire chevalier je vous veuil demander une joyeuse demande. c'est lequel
vous ameriez le mieulx se vous teniez vostre dame par amours en lieu
secret ou qu'elle fust vestue des plus precieux habis du monde ou que la
tenissiez nue entre deux sacs.
Le chevalier.
Damoiselle a ceste demande a beau choix. car trop mieulx l'ameroie nue
entre deux sacs que vestue des plus riches draps du monde. Comme mon
cuer ne desire que son gracieux corps et non ses riches habis.
La damoiselle.
Sire chevalier je vous demande se vous amiez dame ou damoiselle et ung
autre aussy l'amast pareillement. lequel ameriez vous le mieulx. ou que
veissiez l'autre issir de la chambre d'elle quant vous y enteriez. ou
qu'il y entrast quant vous en ysteriez.
Le chevalier.
Damoiselle que l'autre en yssist et je y entraisse. car se je lui veoie
entrer et j'en ississe jamais n'auroie joye en mon cuer tant que a elle
parlé auroie.