Produced by Laurent Vogel and the Online Distributed
Proofreading Team at http://www.pgdp.net (This file was
produced from images generously made available by the
Bibliothèque nationale de France (BnF/Gallica) at
http://gallica.bnf.fr)
[Les adevineaux amoureux]
Pour par chevaliers et escuiers entretenir dames et damoiselles en
gracieuses demandes et responses et pour joyeusement deviser et passer
le temps ensemble affin ausi d'eviter oyseuse mere et nourrice de tous
vices. j'ay tissu un petit livret ou quel j'ay entrechangié pluiseurs
honnestes demandes et responses que fist nagaires une damoiselle a un
gentil chevalier sage et courtois touchant le fait et mestier d'amours
qui n'est pas pou de chose a mener et conduire comme autresfois l'ay
esprouvé et comme le font de present pluisurs qui par aventure se cestui
livret avoient veu ilz en seroient plus et mieulx usitez envers les
dames a respondre et aussi a demander choses honnestes et affreans a
tout honneur. Et pareillement le chevalier a son tour demande a la
damoiselle pluiseurs demandes touchant le fait des dames ausquelles la
damoiselle respond moult sagement et prudentement comme il apperra ou
procés de ce petit volume. Et pour ce que en commun proverbe se dit que
en moult de parolles ne deffault vice et aussy que esdittes demandes et
responses y seront mises pluiseurs dictions et mos qui sembleront
deshonnestes a aucunes par quoy ilz paraventure vouldront blasmer cest
euvre. je leur prie qu'ilz ayent regard au premier impositeur d'iceulx
lequel n'en eust aucune honte de les ainsy nommer. Et aussy que toutes
choses qui sont escriptes sont a nostre instruction et doctrine
escriptes comme nous tesmoingne l'appostre. Pourquoy je supplie a tous
les liseurs de ceste euvre. et especialement aux dames que desplaire ne
leur veuille. Et s'aucune chose y a qui leur semble deshonneste et
vergoingneuse. tournent le fueillet en convertissant leur maltalent en
risee joyeuse delaissant cest article a une autre qui paraventure comme
bonne galoise le mettera en euvre et en fera son prouffit. Or me soit
doncques pardonné. car ceste hardiesse m'a mis en corrage le noble et
gentil chevalier seigneur de la marche que dieu gard. Et aincoires pour
augumenter cedit traittié m'a de sa grace donné aucunes demandes et
responses moult honnestes dont je l'en remercie.
Honneur aux dames.
La damoiselle demande.
Sire chevalier puis que temps et loisir avons de deviser afin aussi pour
mieulx et plus sagement gouverner et conduire ma gentillesse en honneur/
je vous supplie et requiers que me dittes tout premierement qui est la
cause pourquoy on aime.
Le chevalier.
Damoiselle moult grant chose me demandez mais a vostre correction et
desplus sages et experimentez je treuve qu'ilz sont quatre manieres de
desirs desquelz les poursuivans amours usent diversement. Le premier des
desirs est de grant pris car on aime une dame ou damoiselle pour d'elle
aprendre et mieulx valoir et pour le tresgrant bien et honneur qui est
en elle et par ce acquerre honneur et pris. Le second desir qui est
honneste est que on aime s'amie ou la damoiselle son ami pour avoir a
mariage qui est saint estat Le tiers qui est lait et deshonneste est
quant aucun aime pour attraire prouffit et gaing de sa partie Et le
quart qui est naturel est quant on aime sa partie pour joyr a sa volenté
et plaisance
La damoiselle
Sire chevalier lequel de ces desirs est le plus honneste et vault le
mieulx.
Le chevalier.
Damoiselle le primier vault trop mieulx des autres car toutes manires de
gens pevent amer par cellui desir sans en aucune manire meffaire.
La damoiselle.
Sire chevalier je vous demande en fleur de gentillesse lequel vous
ameriez le meulx ou a joyr de voz amours sans desirer/ ou a desirer sans
joir.
Le chevalier.
Damoiselle a les desirer sans en joir. Car nul ne puet savoir la grande
vertu qui est en amours s'il n'a avant eu et sentu l'aguillon de loyal
desir.
La damoiselle.
Sire chevalier aincoires vous demande lequel vous aimeriez mieulx ou a
faillir a l'amour de vostre amie pour doubte que on ne s'en apperceust
et par aventure qu'elle en peust estre blasmee ou a en joir par tel si
qu'elle en demourast en celle aventure.
Le chevalier.
Damoiselle trop mieulx aimeroie a faillir de la joissance de son amour.
Car je ne puis ne ne doy estre avanchié la ou madame en amours fust en
riens amoindrie de son honneur.
La damoiselle.
Sage chevalier or me dittes lesquelles deux choses sont qui plus nuisent
et font de mal en amours aux vrays et loyaux amans.
Le chevalier.
Damoiselle a mon aviz ce sont desir et paour. Car desir esmeut tousjours
l'amant a requerir sa dame de merci. Et la paour qu'il a d'estre
escondis l'esbahist telement qu'il n'ose ne scet parler a elle quant il
s'i treuve.