_Por qué razones se mueven los homes á facer guerra._
Mover guerra es cosa en que deben mucho parar mientes los que la
quieren facer ante que la comienzen porque la fagan con razon et con
derecho, ca desto vienen grandes tres bienes: el primero que ayuda
Dios mas por ende á los que asi la facen; el segundo porque ellos
se esfuerzan mas en sí mesmos por el derecho que tienen: el tercero
porque los que lo oyen si son amigos ayudánlos de mejor voluntad, et
si enemigos recelanse mas dellos. Et este derecho segunt mostraron
los sabios sobre que la guerra se debie facer, es sobre tres razones:
la primera por acrescentar los pueblos su fe et para destroir los que
la quisieren contrallar; la segunda por su señor queriéndole servir,
et honrar et guardar lealmente; la tercera para amparar á sí mesmos,
et acrescentar et honrar la tierra onde son. [877] Et esta guerra se
debe facer en dos maneras: la una de los enemigos que son de dentro
del regno que facen mal en la tierra robando et forzando á los homes
lo suyo sin derecho; ca contra estos deben seer los reyes, et aquellos
que han de judgar et complir la justicia por ellos et comunalmente todo
el pueblo para derraygarlos et redrarlos de sí: porque segun dixieron
los sabios tales son los malfechores en el regno, como la ponzoña en
el cuerpo del home, que mientre hi está non puede seer sano; et por
ende conviene que guerreen con tales homes como estos corriéndolos et
faciéndoles quanto mal podieren, fasta que los echen del regno ó los
maten, asi como desuso diximos en las leyes de los títulos que fablan
en esta razon, porque los homes que morasen en la tierra puedan vivir
en paz. Mas la segunda manera de guerra de que agora queremos fablar,
es de aquella que deben facer contra los enemigos que son fuera del
regno que les quieren tomar por fuerza su tierra ó empararles la que
con derecho deben haber: et desta queremos mostrar en qual manera
la deben facer segunt dixieron los sabios antiguos que lo sopieron
naturalmente, et los otros caballeros que fueron sabidores della por
obra et por uso de luengo tiempo.