_To my maister, John Paston, Squier, be this delyvered._
[Sidenote: 1454(?) / SEPT. 2]
Ryght worshypfull Sir, I recommaund me to yow. And my maister hertly
thankyth yow for the venyson that ye sent hym from my Lord of Oxford,
and prayeth yow that he may be recommaunded to hys noble Lordshyp. And
God thank yow for your speciall remembraunce of my mater that ye hafe it
so tendyrly to hert, for ye may know weel the gode spede of that ys my
wellfare and the contrarye ys my utter undoyngs. I hafe sent to John
Porter to wete verrayly how it standyth with hym, as ye shall wete the
certeynte thys weke. As for the mater wryt to Bokkyng he hath rad ys
lettre, and wille remember your desyre, and also of William Geney
comyng, yn case he know of it rathyr then ye.
And my maistre herd the substaunce of your lettre red, and lyked it ritz
well. And as for the mater of Worcester remembraunce, he shall geve hys
attendaunce therto yn that he can. And where ye calle hym maister, he ys
displesed wyth that name, for he may spend v_s._ yerly more by the name
of Worcestr or Botoner, and by hys maister not a ferthyng yn certeynte.
He prayth yow foryete it.