_Dominus de Grey._
[Sidenote: 1454 / JULY 15]
Right worshipfull and my ryght gode Lord, I recomand me to yowr gode
Lordship. And where as it pleasyd yowr Lordship to dyrecte yowr letter
to me for amaryage for my por suster to a jantylman of yowr knowleth of
CCC. marc lyflod, in cas she wer not maryd; wherfor I am bownd to do
your Lordship servyse; forsothe, my Lord, she is not maryd, ne insurid
to noman; ther is and hath be, dyvers tymys and late, comunycacion of
seche maryages wyth dyvers jantylmen not determynyd as yett, and whedder
the jantylman that yowr Lordchip menith of be on of hem or nay I dowth.
And wher as your seyd letter specyfyith that I shall send yow word
whedder I thowght ye shuld labour ferther in the mater or nay, in that,
my Lord, I dare not preswme to wryte so to yow wythowte I knew the
gentylmans name,--notwythstandyng, my Lord, I shall take uppe on me,
wyth the avyse of other of here frendys, that she shall nother be maryd
ner inswryd to no creatwr, ne forther prosede in no seche mater befor
the fest of the Assumpcion of owr Lady next comyng, dwryng whyche tyme
yowr Lordship may send me, if itt please yow, certeyn informacion of the
seyd gentylmanys name, and of the place and contrey where hys lyfflod
lyth, and whedder he hath any chylder, and, after, I shall demene me in
the mater as yowr Lordship shall be pleasyd; for in gode feyth, my Lord,
it were to me grette joy that my seyd pore suster were, according to
hier pore degre, marijd be yowr avyse, trustyng thanne that ye wold be
here gode Lord.
Ryght wurchipfull and my ryght gode Lord, I beseche Almyghty God to have
yow in His kepyng. Wrete att Norwych, the xv. day of Jull.
[Footnote 327.1: [From Fenn, iii. 216.] This letter is the
answer to No. 250, originally printed from a copy in Paston’s
own handwriting, without signature.]
253