_To my rygth wirchipfel hosbond, John Paston, be this delyverid in
hast._
[Sidenote: 1452 / JULY 4]
Ryth worshipfull hosbond, I recommawnd me to yow, desyryng hertyly to
her of your welfar, praying yow that ye woll send me word in hast how ye
be agreid with Wychyngham and Inglose[266.2] for that mater that ye
spake to me of at your departyng; for if I shuld purvey other wood or
hey, it shuld be bowgth best chepe be twixt this and Seynt Margretys
messe,[266.3] as itt is told me. As for Applyard, he com not yett to
this town syn he com from London. I have sent to Sir Bryse to lete me
have knowleche when he comyth to town, and he hath promysid that I shall
have knowleche, and when he comyth I shall do your commawndement. My
moder bad me send yow word that Waron Herman hath dayly fyshid hyre
water all this yer, and therfor she prayith yow to do therfor while ye
be att London as ye thynk best.
Chyrche[266.4] of Byrlyngham was toke and browte to the castell
yisterday be the Beshopys men, and all his godys ben seysid for that he
owyth to the Boshop. And the seid Chirche seyth as for that he hath seyd
of hem that he hath appelyd befor this tyme, he woll awow itt and abyd
therby; and seyth that he woll appele one that hath mor nobelys than
they have all that he hath spoke of yett, and that shall avayll the King
more than they have all that he hath speke of yett; but what he is, he
woll not name tyll he know mor. I trow but if that be the grett labour
made ayens hym, he is lyke to have grett favour of hem that have be his
supportors. Men thenk that have spoke with hym that he hopeth to have
good helpe. I pray God that the trewth mote be knowyn.
I pray yow that ye woll vouchesaff to send me an other sugor loff, for
my old is do; and also that ye well do make a gyrdill for your dowgter,
for she hath nede therof. The blyssid Trinyte have yow in his kepyng.
Wretyn at Norwyche in hast, on the Tewysday next befor Seynt Thomas
day.[267.1]