[Sidenote: 1452 / APRIL 23]
Right wurchipfull, we commawnd us to yow. Please it yow to wete that we
and other jentilmen of the shyer of Norffolk hath be in purpose assewyd
[_have sued_] to the hygh and myghty Prynce and owr ryght gode Lord the
Duke of Norffolk to Framlyngham, to have enformyd his Highnesse of
dyvers assaughtes and ryottes made be Charles Nowell and other ageyn the
Kyngs lawe and peas, withowte any cause or occacion, up on John Paston
and other of owre kynne, frendes and neyghborys, ne had be that dayly
this x. days it hath be do us to wete that his Highnesse shuld come in
to Norwych or Claxton, we not beyng in certeyn yet whedyr he shall
remeve; praying yow as we trust, that ye woll tender the welfare of this
shyer and of the jentylmen ther in, that ye woll lete owr seyd Lord have
knowyng of owr entente in this, and after to send us answher wheder it
please his Highnesse we shuld come to his presens, and in what place, or
to send owr compleynt to hym if mor informacion be thowch behoffull,
trostyng to his gode Lordshep of remedy in this mater; whiche do [i.e.
_done_], semyth us, shall be owr seyd Lordys honur and gret rejoyng to
all the jentylmen of the shyer, and cause the peas to be kept her after
be the grace of God, how have yow in hys blyssed kepyng. Wretyn at
Norwyche, on Seynt Georgys day.