_To Right Worshipful sir and my gode maister Johan Paston, escuier, &c._
[Sidenote: 1452 / FEB. 9]
Right worshipful Sir, and my Right gode Maister, I Recommaunde to yow
with al myne hert. Plese yow that I have understanden that Daniel hath
entred in to Brayston, and put owte my servantes and dispoiled my godes,
notwithstandinge I am here in the Kinges service and under his
proteccion, which was shewed him; for the whiche owtrage I write to the
King at this tyme and to other my gode lordes, for to be kepte in my
pocession, and to be restored again to my godes. And if so be that I may
not have my pocession ayene and be restored to my godes as I desire,
I wol take an accion be your avis of forsable entre in my name and my
wifes for owre title, &c., and an accion of trespasse for dispoiling of
my godes ayenst him and al tho that were helpinge or consenting therto,
&c., and assisse of a novel Disseson in my sonnes name, Johan of Berney,
for to trye the title and ende debate with Goddes help and youres, &c.;
for the whiche matere I write unto my fader, to myne Eme[257.1] Adam, to
my Cosyn Fyncheham, to Edmond Piers, and to other divers of my frendes
to be my helpers in thes mater in myne absence. For I may not come nor I
wol not come, though I shulde lese al Brayston, and it were myne,
considering that the enemyes drawen dailly hedirward, as it is openly
said, &c. Wherfore I praye yow, as my ful trust is in yow, to tendre
this matere in myne absence. And that it shal plese yow to recommaund me
to my worshipful maistresse and gossip, your wif. And my maistresse
recommaundes her vnto yow, and to her worshipful nece, and to al youres.
Prayinge Almighty God to have yow in his kepinge and sende yow right
gode lif and longe, after your awne hertes desire. And, Sir, if it plese
yow to come to Calais with the king, ye shul have a stope of bere to
comforte yow after your travaille of the see. And if ther be any service
that ye wol commaund me to do for you here, ye shul fynde me your owne
man. Written at Calais, the ix^e. day of Feveree, &c.--Your awne
seruant,