_To John Paston dwyllyng in the Tempyll at London be this letter
delyverid in haste._
[Sidenote: 1451 or later / NOV.]
I gret zou well, and lete zou wete that Warne Harman on the Sonday after
Hallumesday after ensong seyd oponly in the cherch zerde that he wyst
wyll that and the Wall were puddoun, thou he were an hundryd myle fro
Paston he wyste well that I wolde sey he ded yt and he xuld bere the
blame, seying Telle yte here ho so wyll, thou it xuld coste me xx.
nobyllys it xall be puddoun azen. And the seyd Warnys wyfe with a lowd
vosse seyd All the deuyllys of hell drawe her sowle to hell for the weye
that she hat mad. And at euyn a sertyn man suppyd with me and tolde me
that the patent[256.1] grantyt to closse but a perch on bred, and that I
had clossyd more than the grant of the patent is as men seyd. And John
Marchall tolde me that there was a thryfty woman come forby the
watteryng and fond the weye stoppyde and askyd hym ho had stoppyd the
weye, and he seyd, they that had pore to zeue it, and askyd here Wat was
freer than zyfte, and he seyd she sey the day that Paston men wold not
asofferyd that. And God be with zou. Wretyn at Paston on Monday after
Hallumys day.
Be zour modyr,