_To my rygth worshypfull hosbond Jon Paston, be this delyverd in hast._
[Sidenote: 1451 / JULY 1]
Rygth worchypfull hosbond, I recommawnd me to yow, desyryng hertyly to
her of yowr wellfar, preying yow to wete that I have spoke with my Lady
Felbrygg[250.2] of that ye bad me speke to her of, and she seyd pleynly
to me that she wold not, ne nevyr was avysyd, neyther to lete the Lord
Moleyns ne non other to have ther intents as for that mater, whyll yet
she levyth. And she was rygth evyll payd with Sawtr that he shuld
reporte as itt was told yow that he shuld have reportyd; and she made
rygth moche of yow, and seyd that she wold nowgth that no servaunte of
herys shuld reporte no thyng that shuld be ayens yow other wyse than she
wolld that your servawnts shud do or seyn ayens her; and if other your
servawnts dede ayens her, or any of her ayens yow, she wold that itt
shuld be reformyd be twyx yow and her, and that ye mygth ben all on;
for she seyd in good feyth she desyryth your frendshep; and as for the
report of Sawtr, she seyd she supposyd that he wold nowgth reporte so;
and if she mygth know that he dede, she wold blame hym therfor. I told
her that itt was told me syth that ye reden [? yeden, i.e. went], and
that itt grevyd me mor that the seyd Sawtr shuld reporte as he dede than
itt had be reportyd of another, in als moche as I had awgth hym goodwyll
befor; and she prayid me that I shud not beleve seche reports tyll I
knewe the trowth.
I was att Toppys at dyner on Seynt Petyrs day; ther my Lady Felbrygg and
other jantyll women desyryd to have hadde yow ther. They seyd they shuld
all abe [_have been_] the meryer if ye hadde ben ther. My cosyn Toppys
hath moche car tyll she her goode tydyngs of her brotheris mater. Sche
told me that they shuld kepte a day on Monday next komyng be twyx her
brother and Ser Andrew Hugard and Wyndham. I pray yow send me word how
they spede, and how ye spede in yowr owyn materys also. Also I pray yow
hertyly that ye woll send me a potte with treacle in hast; for I have
ben rygth evyll att ese, and your dowghter bothe, syth that ye yeden
hens, and on of the tallest younge men of this parysch lyth syke and
hath a grete myrr’. How he shall do God knowyth. I have sent myn unkyll
Berney[251.1] the potte with treacle that ye dede bey for hym. Myn awnte
recommawndeth her to yow, and prayith yow to do for her as the byll
maketh mencion of that I send you with this letter, and as ye thenk best
for to do therinne.
Ser Henry Inglose is passyd to God this nygth, hoys sowle God asoyll,
and was caryid forthe this day at ix. of the clok to Seynt Feythis, and
ther shall be beryid. If ye desyer to bey any of hys stuff, I pray you
send me word therof in hast, and I shall speke to Robert Inglose and to
Wychyngham therof; I suppose thei ben executors. The blyssyd Trinyte
have you in his kepyng. Wretyn at Norwyche in hast on the Thursday next
after Seynt Peter.[251.2]