[Sidenote: 1451 / MAY (?)]
Ryght worchipfulle Sir, yours goode cosynes and frendes avyse yow to
come to Walsyngham, and that ye be there to morw betymes at vj. on the
clok; for the Lord Moleyns offreth a trete for the goodes, and amendes
to be made, or he goth ought of this contre, and if it be not taken,
his men shulle justifie; wherupon your title might be hurte. The Lord
Skales, the Justis, and other knygtes and squyeres merveyle grettly ye
come not, and thow they that have not so true and evident mater as ye
have concelle yow to be absent; yet I wolde ye dede as ye be desyrd be
that felaship, for many wolde yow right welle. Whanne ye come, I shalle
telle yow more.
The Lorde Moleyns shulde not have be aquyte of his comaundement, hadde
he not sworen on a boke, sweche evidens was ayens hym; and ther is no
jentelman wolde aquite his men for no goode, &c.