_To my rith wurshepfull hosbond, Jon Paston._
[Sidenote: 1451 / MARCH 3]
Rith worchipfull hosbond, I recommawnd me to yow, praying you to wete
that ther is a gret noyse in this town, that my Lord of Oxforth and
Yelverton and ye ben endytid in Kent for mayntenyng of the oyer
determyner; and Jon Dame is endytyd ther also of treson, be cawse that
he dede Heydon endytyn[225.3] of treson for takyng down of the quarter
of the man. And the pepyll that ben ayens Ser Thomas Todenham and Heydon
ben sore aferd be cawse of this noyse, and of other langage that is had
bothe in this town and in the contre, that these seyd Todenham and
Heydon shuld ben as well at ese, and have as grett rewill as ever they
hadde.
Jamys Gloys tellith me that he hath sent yow word of Heydonys hors and
of other thyngs, mor of whiche I was purposid to asent yow word of. The
Holy Trinyte have yow in kepyng. Wretyn at Norwiche, the Weddenysday
next after Seynt Mathy.[225.1]
Yowris,