_To my right reverent and wurchepfull mayster, John Paston, Esquyer,
be this delivered in hast._
[Sidenote: 1451 / MARCH 2]
Right reverent and wurchepfull Sir, I recomaund me to you, prayng you to
wete that I have labored divers men that ben enpaneld atwix my mastres,
your moder, and Wyndham.[223.4] Ther be many of them woll do her parte,
and ther ben summe that wull not passe ther upon, for thei ben aferd
that the werd [_world_] shuld turne. It is noysed in Norwhich that my
Lord of Oxenford, my mayster Yelverton, and ye, and John Damme shuld be
endited in Kent for mayntenaunce of the _oyer determyner_ in Norffolk;
and this, with othre feryth sore men of Norwhich. I trow my mastres
writyth to you here of more clerly. Item, Wyndham hath be divers tymes
at my mastres Cler, and mad hym erands to her, and told her that he was
sued in my mastres, your moders name but he supposyd that she knew not
there of. He thought that ye and James Gresham had do it un malyce, my
mastres your moders unknowyng. But whan he knew that I labored the
enqueste, than he sent my mastres Clere word how that he knew wele that
it was my mastres your moders labore. Item, he told my Lady of
Morle[224.1] of this sute, and he seid that he wend that my seid lady
had mad an hend a twix them for the seid sute. Item, Heydons men brought
his awyn hors and his sadyll thourgh Aylsham on Monday, and thei comyn
in at the Busshoppes gates at Norwhich and comyn over Tomelond and in to
the Abbey. Thei a bedyn there all that nyght, and ij. days after, wenyng
to men of the town that Heydon had go over the fery, and so in to the
Abbey; and sythyn thei seid thei shuld go to London for Heydon. Item,
sum seyn that Heydon shuld be mad a knyght, and myche othre langage ther
is which causyth men to ben aferd, wenyng that he shuld have a rewle
ageyn. Item, there were ij. men at John Betes of Holt; thei had langage
of the Lord Moleyns. If it please yow to enquere of Symond, brynger of
this letter, he shall enforme you of her langage. Item, Gonnor was
wetched at Felbrygge Halle with xl. persones of the Lady
Felbryggs[224.2] tenaunts and mor that night that I lay on wayte up on
hym, and he durst not go home on the next day till they brought hym
home. Thei mad a compleynt to my Lady Felbrygge, and my mastres had
excused it. Item, the manase Burflet, and wull sease his lond. Symond
shall telle yow how thei wer answered. Item, as for the subsidy that Sir
Herry I[nglos] and the Lady Felbrygge shuld payn, the meyr knowe not yet
veryly what thei schuld pay, for thei have not cast the valew of her
londs. The bill closyd in this letter maketh mensyon of the valew of
divers gentelmens londs that [ben] examyned in Norwhich. We can not know
what Calthorp payth, for we can not speke with the shereffe, ner the
undre [shereffe], ner no man that gadered that hundred ther as Calthorp
dwellytht. The Holy Trynyte have you in his kepyng. Wr[etyn] the Tuesday
next after Seynt Mathie,[225.1] in hast.
Your pore servaunt,