_To my ryght reverent and ryght worchepfull mayster, my mayster Paston
in hest posybyll._
[Sidenote: 1451 / JAN. 9]
Syr, lyke yt yow to know that my lord Scalys sent hese pursevaunt unto
my mayster[210.2] on the Twelthe day, that my mayster shuld mete wyth
hym atte Wynche aforn my Lord of Oxenford on the Thursday nest folwyng.
And whanne my mayster cam thedyr, he delyvered my mayster a letter from
my Lord Chauncheler, quych my mayster wyll shew yow atte Lenn. I shuld
send yow a copy therof, but it is so longe that I had no leyser to wryte
it. My mayster rode to Walsyngham on the Fryday folwyng, and ther he
mette with the shereve, and the shereve lyveryd my mayster a letter from
my Lord of Norffolk, qwych I send yow a copy of. And atte Walsyngham my
mayster resceyvyd a letter from Osberne youre man. And ther Heydonis man
made hese avaunte that he was the Justice of the Pease on Caustonheythe;
and so it semyth be here contenaunce that they trost of a good zere.
And, Syr, whanne my mayster cam hom on Saterday ther was lyvered my
mayster a letter from Sir John Fastolf, and a neyther letter cam to me
from John Bokkynge,[210.3] qwych I send you a copy of. Sir, God send us
a fayre day atte[210.4] Lenn. And that ther may be pople jnow to crye up
on the Lord Scales that he mayntene not Sir T. T. and H. in here
wronges, as the copy of B letter makyth mencion. And, Sir, atte the
reverens of God, laborth youre materis wysely and secretely, for Wyndam
noysed yow sore aforn my Lord of Oxenford and my Lorde Scales that ze
shuld reyse meche puple with grette arey owte of Norwyche. And therfor,
Sir, late the puple be wysely and manly gydyd in here frekynge and
demenynge. Also my Lord Scales sent for the parson of Sw[a]fham and
divers men of the same town to mete with hym aforn my Lord of Oxenford
the seyd Thursday, for to trete with hem for Sir Thomas Tudenham; and
ther was the baly of Swafham and Sir Thomas Tudenham prest. And so my
Lord Scales yave the parson of S. grette langage and to men of same
towne. Y. and the parson answherd my Lord Scales manly in the best wyse.
And ther was grette langage twexen Blake the baly and Tudenham prest
that my lordys and my mayster worne acornberd therof. And so it is lyke
that my Lord Scales shall make ther no loveday; and so Swafham wylbe
ther in here best array. Also, Sir, Brygge was atte Walsyngham; and ther
he craked grette wordes, and seyd to many divers men that it shuld be
thanked alle tho that labored a yens hem. And he seyd that it worne but
viij. personys, and yf men be men now it shuld be thanked hym and told
hym atte Lenn. In the lest wysse he is now with the Lord Scales; the
Lord Scales wyte Thomas Denyes, John Lyster and me all those
indytementis. And the Lord Scales seyth that I made all the bylles and
the panell; and so he is hevy lord to me and to Thomas Denyes. Prentys
is atte hom with the Lord Scales; the shereve told me that he wyll do
for the Cyte of Norwych as meche as he may. Sir, I wold ther worne a
thowsand of good Maudby men to crye owte on Tudenham, Heydon, Prentys
and Brygge for here falsse exstorciones. Also, Sir, atte the reverens of
God, make an ende atwexen Sexeford and men of Salle; it lyeth in your
power. I shall make redy youre forsebyll entres ayens Lenn, with the
grace of God, Qwych have yow in Hese kepynge. Wretyn atte Rougham on
Saterday nyte in hest.
Sir, I send yow and lewde letter be Richerd Yenneys. I beseche yow be
ware to whom ze shew your letters; lete them be brente.--Be your
servaunt,