_To my ryght trusty and intierly welbeloved John Jermyn, Shirreve of
Norffolk._
[Sidenote: 1451 / JAN. 2]
Right trusty and intierly welbeloved, I grete yow wele. And where late
by the Kyngs comaundment in the tyme of his Parliament, holden now last
at Westminster, I was in persone at Norwich, holdyng Sessions of oir
determyner[203.3] with Yelverton, on of the Kyngs Juges, by greet space
and greet attendaunce, which for to a do with suych diligence in the
Parliament tyme I wold a be right lothe, but for the pupplyk wele of all
the shire.
It is also not oute of your remembraunce what indisposicion the Commons
of bothe countes in the ende of somer last passed wer of, and how the
Kyng, by the hole advyse of all the greet Councell of Ingland, to sese
their rumour, send hider his said Commission; and how I have do my part
therynne, I reporte me to all the world. I here a gruggyng,
neverthelesse, that trow favour in your office to the pople that hath
compleyned by many and grete horible billes agayn certeyn persones shuld
not be shewid at this next Sessions at Lenn, ne ferther in the said
Comission, which, if it so were, as God defend, myght cause a latter
errour wurs than the first.
I pray yow, therfore, that ye wole write to me your disposicion how ye
purpose to be demened, and how I shal take yow for th’execucion of the
Kyngs Comission, and the pupplik wele of all the shire; and aftir that
that ye write to me, so wole I take yow, latyng yow wete that I were
lothe to labour ferther but if I wist that the Commons shuld be easid as
Godds law wold; and if ony errour grow, the defaute shal not be founde
in me.
I pray yow more over to gif credence to the berer her of, and the
Trinite kepe yow. Wretyn at Wynch, the second day of January.