_To my cosyn, John Paston._
[Sidenote: 1450 / OCT. (?)]
I recomawnde me un to yow the best wyse I kan. Whanne I cam to Ware,
ther herd I furst tydynges that the Lord Moleyns shuld come in to
Norfolk in hast with grette pupyll, and, as on of hys men seyd ther,
with the vij^xx [_sevenscore_]. Also a man of the Lady Morles[179.2] cam
thedyr owte of Wyllshire ther thanne, and seyd that the seyd Lord was
comyng thedyrward with grette pupyll. And atte London a man of hys hedde
large langage, and seyd that my Lord shuld come to Norffolk, and do
meche thyng agayns hem that hadde do indite hym and hys men, and also
for the personyng of hys men atte Norwych. This is sopposyd verely to be
Heydons werke that wyll sette hym verely to do the utterest ayens yow
and John Dam in the werst wyse that he can. Ze have both lordshep and
frendshep in your countre, and also good inow to reciste hym yf he wyll
do yow wronge, and peraventur that shuld brynge thys matier nyer and
ende thanne it is now. Whedder it be to done or not, I remitte that to
youre counceyll.
Also, my Lord[179.3] shall be atte Walsyngham on Sonday nest comynge,
a from thens he shall go to Norwych. For any thynge in the werd
[_world_] meve my Lord of Oxenford and my cosyn Sir Miles Stapulton that
they awayte up on my seyd Lord in the most wurchepfull wyse that they
kun, and do hym as good attendaunce and plesaunce as they mown. And ye
do the same also; and that the cyte of Norwych mete with hym in the best
wyse also; and also that they and ze also cherse and wirchep well Sir
William Oldhalle. And ther be good informacion made ayens T. T. and
H.,[180.1] for they wyll spend m^l. m^l. _li._ [£2000] for to come in
ther, and that were petye. Spende sum what of your good now, and gette
yow lordshep and frendshep ther, _quia ibi pendet tota lex et prophetæ_.
And send som man to aspye of the governaunce, and of the comyng of the
Lord Moleyns, and take hed to your self. And byd John Dam be war of hym
self. Sum men suppose that my Lord of York cherse not meche the seyd
Lord Moleyns. And send sum men hedyr often to London that mown he them
here and brynge yow tydynges. And I pray God spede yow in alle youre
werkes.
Youre Cosyn,