_To my right worshipfull [mai]ster John Paston at Wynchestre be this
delyuered._
[Sidenote: 1450 / JULY 3]
After al due recomendacion had, I recomaunde me to yow and prey yow to
wete that Heydon seweth in his accion a geynst Osebern x. _tales_
retournable xv^a. Johannis. _Ideo mittetur vel loquatur Vicecomiti
Norffolk_, &c. And I suppose that as for Costardis accions thei wole
have _nisi prius_, &c. As touchyng the matier of Oxened the frere[156.3]
leveth his delagacie a abideth up on our plee of profession by as meche
as we sey that long to fore the writte purchaced he was professed a
frere and sey not and yet is professed, &c. And Sotyll and other of your
counseill thynk the law is on our syde. Brampton brought me a lettre and
a clowt sowed clos with thynggis therin, and a letter endorsed to yow
from my maistresse your moder, whiche I sende yow with this. The lord
Moleyns man brought ij. writtes to the Shirrefis depute of Norfolk, oon
a geynst yow, myn eme[157.1] and James Gloys _quare clausum suum apud
Gresham fregerunt_, &c., the othir writte a geynst yow and J. Gloys
_quare vi et armis in hominis et servientes ipsius apud Gresham insultum
fecerunt_, &c. And whanne the seid lord Moleyns man delyvered these
wrettys, Lomnour stode be side and aspied it. And thanne the seid man
desired to have ageyn the writtis, and toke hem a geyn; and whanne he
had theym he seid they shuld not come in their handes a vii. nyght
after. And so he kepeth theym stille. And Caly and Yates also have
promysed me that ther shall no writte be retourned a geyn yow but that
ye shall have copies ther of at reasonable tyme to make your avantage as
the law wole, &c., to caste your esson[157.2] or suyche other, &c. Sir,
I prey God yeld yow for your letter ye sent me by Lethom, whiche I
receyved yistereuyn right late. Wherby I hope and conceyve that ye be in
good cas for your maner of Gr[esham], for truly I was right weel
comforted therof. As touchyng Skyner and his borwys the attachementes
may not be wretyn but by the recordes of the reconysance, and alle the
recordes of Chauncerye be at Wynchestre. _Ideo_, &c. I prey God be your
good speed in all your matiers, Amen. Wretyn in hast at London the
Friday next after seint Petir day.
Your servant,