_To my maister Paston._
[Sidenote: 1450 / MAY 13]
I recomaund me unto your good maistership; and as for tidings, Arblaster
come home to my Lord[150.2] on Munday, at sopertyme; and my Maister
Danyell[150.3] is Styward of the Duche of Lancastre by yonde Trent,
and Arblastr seith he hath made me his undirstyward.
And as for the Chamberleynship of Inglond, the Lord Beamond[150.4] hath
it, and the Lord Rivers[150.5] Constable of Inglond.
As for the Duche on this side Trent, Sir Thomas Tudenham had a joynte
patent with the Duke of Suffolk,[150.6] which, if it be resumed, Sir
Thomas Stanley hath a bille redy endossed therof.
My lord wole not to Leicestre.[150.7] My Maister Danyell desireth yow
thedir. I shall ride thiderward on Friday by tymes.
Wretyn in hast at Wynche,[150.8] the xiij. day of May.
I pray yow to thynk upon my mater to my mastresse your wyf, for my
mastresse Anne, for in good feith I haf fully conquered my lady sith ye
went, so that I haf hir promisse to be my good lady, and that she shall
help me by the feith of hir body.
Your servant,